ریاض۔ 29 فروری (اے پی پی) سعودی عرب نا وزیر توانائی شہزادہ عبدالعزیز بن سلمان پارینے کہ توانائی نا بشخ اٹی 50 ہزار آسامی ودی کننگک۔ اخبار 24 نا رداٹ وزیر توانائی ریاض نا شاہ عبدالعزیز انٹرنیشنل کانفرنس سینٹر اٹی ولی عہد نا زیر سرپرستی اڈ ہلوک آ کانفرنس، ہیومن کیپبلیٹی انیشی ایٹیو، (انسانی لائخی تے مون آ اتنگ کن مہم ) آن تران کرساپارے کہ توانائی نا بشخ اٹی 75 درسد سعودائزیشن نا کانود آ عملدرآمد کننگ نا پابند ءِ۔ وزیرتوانائی پارے کہ مملکت نا ویژن 2030نا ہدف آتا رداٹ توانائی نا بشخ اٹی زالبول آتے واکدار کننگ مملکت نا سرکڑدہ غاتا اولیت ءِ۔ مملکت اٹی دا بشخ اٹی زالبول آتا شریداری 15 درسد ءِ ہراٹی پین ودکی نا گنجائشت ءِ۔ اوپارے کہ زالبول آتا اہم کڑد ءِ ہچ ءُ حالیت اسے ٹی گوجالنگ مفک، مملکت اٹی زالبول آتا اہمیت ءِ امنا کننگانے۔ اوفتا پاننگ ئس کہ مملکت اٹی اِرا بنداوی ضابطہ غاتے مقدم تخنگ انگ ءِ ہرافتے ٹی ورناو واکدار آتے واکدار کننگ ءِ داکان بیدس پین مسٹ میکو اصول اس مون آ بتنے۔ کانفرنس اٹی وزیر توانائی مملکت نا کہول آ اولیکو بڑزکو کہول انا کالج’کابسارک’(پبلک پالیسیز ہائیر سٹڈیز کالج) نا جوڑ کننگ نا پڑو کرے ہرانئے بیرہ مملکت بلکن ڈیہہ اٹی تینا وڑنا اولیکو بڑزکو انگا کالج مریک۔
