پشاور۔ 28 فروری (اے پی پی) خیبرپختونخوا اسمبلی نا پوسکن گچین مروک آ باسک آک سوغند ہرفیر۔ خیبرپختونخوا نا پوسکن گچین مروک آ اسمبلی نا اولیکو دیوان اسپیکر خیبرپختونخوا اسمبلی مشتاق غنی نا کماشی ٹی چارشنبے نادے آ پشاور اٹی صوبائی اسمبلی نا ماڑی ٹی اڈ ہلک۔ دیوان کم وود 2 گھنٹہ نا تاخیرآن بناکرے۔ دیوان اٹی خیبرپختونخوا اسمبلی نا پوسکن گچین مروک آ 115 باسک آک سوغند ہرفیر۔ دیوان نا بناء آ اسپیکر صوبائی اسمبلی ایماندار و شہیدآتیکن بخشش نا دعاکرفے۔ صوبائی اسمبلی نا اسپیکر و ڈپٹی اسپیکر نا گچینی پنچ شنبے وخت اس کہ وزیراعلیٰ نا گچینی جمعہ غا مریک۔ الیکشن کمیشن نا کنڈآن خیبرپختونخوا اسمبلی نا 110 جنرل و 5 زالبول آتا نشست آتا نوٹیفکیشن جاری کننگانے۔ باجوڑ و کوہاٹ اٹی صوبائی اسمبلی نا اومیتدار آتا کزیت نا سوب دااِرا حلقہ غاتیٹی گچین کاری مننگ کتو۔
