اسلام آباد۔ 28 فروری (اے پی پی) الیکشن کمیشن سنی اتحاد کونسل ءِ زالبول آتا مخصوص نشست الاٹ کننگ نا بابت درخواست آتیا فیصلہ ءِ ڈک کرے وخت اس کہ سماعت اٹی چیف الیکشن کمشنر سکندر سلطان راجہ سنی اتحاد کونسل نا کنڈآن 26 فروری آ لکھوک آ چٹھی ءِ کونسل نا وکیل بیرسٹر علی ظفرنا دوٹی تس ہراٹی سنی اتحاد کونسل موقف تینا کرینے کہ او پارٹی نا پلیٹ فارم آن لس گچین کاری تیٹی بشخ ہلتنےہندا سوب آن اوفتے مخصوص نشست درکار اف۔ چارشنبے نادے آ چیف الیکشن کمشنر نا کماشی ٹی بنچ سنی اتحاد کونسل ءِ زالبول و اقلیت تا مخصوص نشست الاٹ کننگ نا بابت کیس انا سماعت مس ۔ داوخت آ مسلم لیگ (ن) ، پاکستان پیپلزپارٹی پارلیمنٹرینز و جمعیت علمائے اسلام (پاکستان ) نا کنڈآن سنی اتحاد کونسل ءِ زالبول آتا مخصوص نشست الاٹ کننگ نا مخالفت کرسا موقف اختیار کرے کہ سنی اتحاد کونسل لس گچین کاری تیٹی تینا پارٹی نا گچین کاری نشان آ ہچ ءُ نشست اس دوئی کتنے و نئے زالبول و اقلیت آتامخصوص نشست آتیا اولیتی فہرست جمع کرفے۔ گچین کاری کانود 2017 نا شق 104 نا رداٹ پندار کاغد آتا تاریخ گدرینگ انگ آن پد پوسکن آفہرست ءِ جمع کرفنگ مفک و نئے مہالو آن تروک آفہرست اٹی بدلی اس کننگ مریک۔ داوخت آ چیف الیکشن کمشنر بیرسٹر علی ظفر ء ِ پارے کہ سنی اتحاد کونسل نا چیئرمین صاحبزادہ محمد حامد رضانا دستخط آتیان 26 فروری آ الیکشن کمیشن ءِ چٹھی اس نوشتہ کننگانے ہراٹی پاننگانے کہ گچین کاری کانود 2017 نا شق 206 نا رداٹ زالبول اومیتدار آتا فہرست جمع کرفنگ نا پارت کننگاسس وخت اس کہ سنی اتحاد کونسل لس گچین کاری تیٹی بشخ ہلتنے۔
