اسلام آباد۔ 27 فروری (اے پی پی) نگران وزیراعظم نا سلاہکار ہوابازی ایئرمارشل (ر) فرحت حسین پارینے کہ ملائیشیا نا کمپنی آن 2015 ٹی لیز آ ہلو ک آ ہڑتوم آ جہاز پی آئی اے 26 ملین ڈالر نا ادائیگی کرسا پدی ہلکنے۔ سے شنبے نادے آ سینیٹ نا دیوان اٹی سینیٹر کامران مرتضیٰ ، سینیٹر سیف اللہ ابڑو، سینیٹر رخسانہ زبیر و ایلوباسک آتا سوج آتا ورندی ٹی نگران وزیراعظم نا سلاہکار ہوابازی ایئرمارشل (ر) فرحت حسین ایوان ءِ پارے کہ پی آئی اے 2015ء ٹی ملائیشیانا کمپنی آن شش سال اکن لیز آ اِرا مسافر جہاز دوئی کریسس و ستمبر 2021 اٹی کنٹریکٹ نا مد چٹنگ آن پد دا جہاز آتے جکارتہ غا پدی گدریفنگا۔ اوپارے کہ شش ملین ڈالر نا ننے ادائیگی کروئی ئس ہرا مالی مشکل آتا سوب آن وخت آ کننگتویسس۔ کووڈ نا دین انا سوب آن دا باندات ہرے نا گواچی مس۔ اوکان پد دا جہاز آتا واپسی کن ملائیشیا نا کمپنی 51 ملین ڈالر نا ادائیگی نا خواست کرے ولے نن مذاکرات کرسا 26 ملین ڈالر نا ادائیگی کرسا دا ہڑتوم آ جہاز تے پدی ہلکونن وداسہ منافع کٹنگ اُن۔
