لاہور۔ 26 فروری (اے پی پی) مسلم لیگ (ن) نا سینئر راہشون راناثناءا للہ و احسن اقبال ئسک پارینو کہ زرگزرانی سوگوی آن بیدس پاکستان مون آ ہِننگ کپک، (ن) لیگ نا سرکڑدہ غاتے پاکستان ءِ سوگو کننگ نا چیلنج مون تروک ءِ ، مریم نواز دا چیلنج اٹی تینا بنداوی کڑد ءِ ادا کیک، پی ٹی آئی ملک اٹی بے چیٹی ، ہڑدڑ تالان کننگ نا کوشست کرے تو سختی اٹ مون تننگک۔ اوفک داخیال آتا درشانی ءِ دوشنبے نادے آ پنجاب اسمبلی نا پیشن اسہ اسیجائی پریس کانفرنس اسے آن تران کرسا کریر ۔ مسلم لیگ (ن) نا سینئر راہشون و پنجاب نا صدر رانا ثناء اللہ پارے ملکی زرگزران نا سوگوی نا چیلنج اٹی پنجاب نا بھلو کڑد اسے، مریم نواز دا چیلنج تون مون تننگ اٹ بنداوی کڑد اداکیک ۔ رانا ثناء اللہ پارے کہ مریم نواز پنجاب اٹی خذمت نا غٹ آن بھلا منصب آ فائز مننگ والا ءِ، پنجاب نا ہزار آ سال نا تاریخ ءِ، اینو اسہ تاریخی ءُ وخت اسے کہ مریم نواز پنجاب نا وزیراعلیٰ پنجاب نا وزیراعلیٰ نا منصب آ فائز مننگ والا ءِ ، داتاریخی لمحہ ءِ ہُننگ کن سرمسونٹ، گمرنا ہیت اسے کہ نن دا تاریخی لمحہ نا بشخ مننگ والا اُن انتئے کہ وزارت اعلیٰ پنجاب خذمت نا منصب ءِ، شہباز شریف بطور خادم اعلیٰ درور اس قائم کرے، نواز شریف نا روایت آتے مریم نوااز مون آ دیک، میرٹ نا بنداو آ کاریم کیک، مریم نواز ءِ غٹ تپہ غاتا کمک دوئی مریک۔ رانا ثناء اللہ پارے کہ بدتمیزی ، بدتہذیبی نا چرجوئی 4،5سال آن برجاءِ، پاکستان ءِ سیاسی سوگوی تننگ غٹ آن بھلو چیلنج اسے، سیاسی سوگوی زرگزرانی سوگوی اتیک، زرگزرانی سوگوی آن بیدس پاکستان مون آ ہِننگ کپک، پاکستان ءِ سوگو کننگ اسہ چیلنج اسے، پنجاب نا دا بابت بھلو کڑد اسے، مریم نواز دا چیلنج اٹی تینا بنداوی کڑد ءِ ادا کیک۔
