گورنر بلوچستان ملک عبدالولی خان کاکڑ مچ آ صوبہ ٹی پولیو تور مہم نا بناءِ کرے

کوئٹہ۔ 26 فروری (اے پی پی) گورنر بلوچستان ملک عبدالولی خان کاکڑ مچ آ صوبہ ٹی پولیو تورمہم 2024 نا بناءِ کرسا پارے کہ پولیو کون آ  موذی ناجوڑی نا دین ننا چناتےمچ آ زند اکن معذور کننگ کیک ، ہندا سوب آن چناتا شونہال و جان جوڑ آخبت ءِ پک کننگ کن المی ءِ کہ غٹ لمہ و باوہ تینا چناتے پولیو نا پڑی ضرور کنفر، یات سلے کہ پولیو دین انا پورو چٹفنگ کن مچ آ بلوچستان اٹی ہفت دے ئی پولیو تور مہم26 فروری دوشنبے نادے آن بناکرسا 2 مارچ اسکان برجاسلک۔ دا پولیو مہم اٹی 26 لکھ 55 ہزار آن زیات پنچ سال اسکان نا وئی نا چناتے پولیو آن بچفنگ نا پڑی کُنفنگک۔ دا پولیو مہم اٹی کم و ود 11 ہزار آن زیات ٹیم بشخ ہلیرہ۔ پولیو تور مہم 2024 نا بنانا وخت آ ڈائریکٹر جنرل ہیلتھ ڈاکٹر غلام فاروق ، ای سی او سید زاہد شاہ، یونیسیف او آئی سی نا سی ایف او ڈاکٹر محمد ہمایوں امیری، این۔ سٹاپ صوبائی سروک ڈاکٹر آفتاب کاکڑ و ڈبلیو ایچ او نا ڈاکٹر جہانزیب کاکڑ ئسک ہم ساڑی ئسر۔ داوخت آ گورنر بلوچستان ملک عبدالولی خان کاکڑ پارے کہ مچ آ وئی اکن معذور کروک آ ناجوڑی نا چٹفنگ اسکان چناتے پولیو نا رکھی پڑی کنفوک آتا رکھ انا بابت کانود نافذ کروک آ ادارہ و محکمہ جان  جوڑی آ زور شاغا کہ او پولیو ٹیم آتا رکھ اتون اوار ایلو پلو آتے ہم مون آتخر تانکہ اسہ علاقہ سے ٹی ہم اسہ چناس ہم پولیو پڑی آن محروم سلپ۔ بلوچستان نا غٹ ضلع غاتیٹی 26 فروری آن 2 مارچ اسکان  مچ آ صوبہ ٹی پنچ سال آن کم وئی چناتے پولیو پڑی کُنفنگ آن بیدس چناتا قوت مدافعت اٹی ودکی کن وٹامن  اے نا ودکی خورہم تننگک۔