اسلام آباد۔ 23 فروری (اے پی پی) چیئرمین سینیٹ محمد صادق سنجرانی پارینے کہ سینیٹ نا انتظامی امور ءِ ہُننگ کن جوڑ کروک کمیٹی تینا آئینی و کانودی کڑد ءِ جوان وڑاٹ پورو کرینے و دادور اٹی غٹ باسک آک پبی کمک دوئی مسنے۔ سینیٹ سیکرٹریٹ نا رداٹ سینیٹ فنانس کمیٹی نا سپاروکی دیوان نا کماشی ءِ کرسا اوپارے کہ غٹ باسک آک دا چرجوئی ٹی مبارکباد نا حقدار ءُ ہرافک شفاف وڑاٹ باندات آتے چلیفنگ اٹ کمکار و راہشونی کرینو۔ چیئرمین سینیٹ محمد صادق سنجرانی پارے کہ شفاف و گچین نظام کاری ننااولیت ئس و دامسخت اٹ نمان سرسہبی ہم ملا۔ دیوان اٹی کمیٹی تدوک آ منہ وخت اٹی کروک آ معمول نا خڑچ آتا منظوری ءِ ہم تس۔ چیئرمین سینیٹ غٹ کمیٹی نا باسک و سینیٹ سیکرٹریٹ نا عملہ نا منت واری ءِ ہم ہرفے۔ کمیٹی نا باسک آک باندات آتے شفاف وڑاٹ چلیفنگ آ چیئرمین سینیٹ محمد صادق سنجرانی ءِ خراج تحسین پیش کرسا اونا قائدانہ لائخی تا ستاءِ کرے۔ دیوان اٹی سینیٹ اٹی قائد حزب اختلاف ڈاکٹر شہزاد وسیم آن بیدس سینیٹر مشاہد حسین سید، سینیٹر ہدایت اللہ و سینیٹر نصیب اللہ بازئی، سیکرٹری سینیٹ محمد قاسم صمد خان، سینیٹ سیکرٹریٹ نا بڑزکو کمامدار و وزارت خزانہ نا نمائندہ غاک دیوان اٹی بشخ ہلکر۔
