لاہور۔ 23 فروری (اے پی پی) لس گچین کاری 2024 نا نتیجہ ٹی جوڑ مروک آ پنجاب اسمبلی نا پوسکن گچین مروک آ باسک آک بطور کانود ساز سوغند ہرفیر، اسپیکر سبطین خان اسمبلی نا باسک آتیان سوغند ہلک، مسلم لیگ (ن) نا پندار وزیراعلیٰ مریم نواز شریف سوغند ہرفنگ کن اسمبلی ہال آ سرمس تو باسک آک شیر شیر نا نعرہ خلکر، دیوان اٹی سنی اتحاد کونسل و (ن) لیگ نا باسک آتیٹی زرس تلخ کلامی ہم مس۔ پنجاب اسمبلی نا بنائی دیوان سہب انا 10 بجہ غا بٹنگاسس ہرا 2 گھنٹہ نا تاخیر آن اسپیکر سبطین خان نا کماشی ٹی بناکرے۔ مسلم لیگ (ن) نا پندار وزیراعلیٰ مریم نواز سوغند ہرفنگ کن اسمبلی ہال آ سرمس تو باسک آک شیر شیر نا نعرہ خلکر وخت اس کہ لیگی باسک آک نواز شریف نا عکس آتے ہرفسا ایوان آ سرمسر۔ ایوان آ بننگ آ میڈیا نا سوج آتا ورندی ٹی مریم نواز پارے کہ اللہ کے پنجاب اٹی خذمت نا اسہ پوسکن ءُ دور اس بناکے۔ مسلم لیگ (ن) نا 215 نا خڑک و سنی اتحاد کونسل نا 98 باسک آک ایوان اٹی ساڑی ئسر۔ (ن) لیگی باسک آک اسپیکر آن سوغند ہلنگ نا خواست کریر، داوخت آ سنی اتحاد کونسل نا وزیراعلیٰ نا عہدہ کن پندار اومیتدار اسلم اقبال اسمبلی آ سر مننگ کتو ولے اسپیکر بیدس سوغند ہلنگ آن دیوان اٹی 45 منٹ انا وقفہ کرے و پارے کہ سنی اتحاد کونسل نا پندار وزیراعلیٰ اسلم اقبال نا پروڈکشن آرڈر جاری کننگ اٹی اُٹ۔ گیشتری باسک آتے اسپیکر نا راستیکو کنڈآ نشست الاٹ کننگا۔ جمعہ نا نماز نا وقفہ غان پد دیوان دُوارہ بناکرے ہراٹی اسپیکر سبطین خان پوسکن گچین مروک آ اسمبلی نا باسک آتیان سوغند ہلک۔ سوغند ہلنگ آن پد باسک آک اسہ ایلو ءِ مبارکبادی تسر ۔ سوغند ہرفنگ آن پد اسمبلی نا باسک آک گولڈن بک آ دستخط ہم کریر۔ پنجاب اسمبلی نا 313 آن زیات باسک آک سوغند ہرفیر ہرافتے ٹی پاکستان مسلم لیگ (ن) و اتحادی جماعت آتا 215 اسمبلی نا باسک و سنی اتحاد کونسل نا 98 باسک اوار ئسر۔ سوغند ہلوک آتیٹی پندار وزیراعلیٰ پنجاب مریم نواز و مریم اورنگزیب ہم اوار ئسر۔ پنجاب اسمبلی نا دیوان پگہ (ہفتہ ) نا بیگہ نا 4 بجہ اسکان کن پدبِٹنگا۔
