اسلام آباد۔ 23 فروری (اے پی پی) نگران حکومت نا دور اٹی وام ہلنگ اٹی مسکوہی دور انا مقابلہ ٹی کمتی مسنے، نگران حکومت نا مد اٹی حکومتی سیکورٹیز نا کمک اٹ وام ہلنگ نا کچ اٹی مسکوہی دور انا مقابلہ ٹی 67 درسد کمتی بسنے۔ جمعہ نادے آ داڑے جاری بیان اٹی وزارت خزانہ نا ترجمان پارے کہ تدوک آ منہ تُوتیٹی ہلوک آ وام تا بھلو بشخ اس وام تا ادائیگی نا زمواری تے پورو کننگ کن ہلنگا ہراٹی اصل زر و سود انا خڑچ آتا زمواریک  اوار ئسر، نگران حکومت بنداوی وڑاٹ مالی سوگوی نا گام گیج آتیا تینا چکار ءِ تخا ہراٹی محصولات تے متحرک کننگ و خڑچ آتے معقول کننگ اوار ءِ۔ وزارت خزانہ نا رداٹ 17 اگست 2023 آن ہلیس 31 جنوری 2024 اسکان نا مد اٹی نگران حکومت ءِ پالیسی ریٹ 22 درسد نا کچ اٹ میرات اٹی ملا ہرا 1972 آن پد بڑزکو انگا کچ ءِ، مسکوہی دور (یکم فروری 2023 آن 16 اگست 2023) اٹی پالیسی ریٹ انا کچ 19.5 درسد ئس۔ نگران حکومت گونڈ مد اٹی وام تا انتظام و انصرام اٹی گچینی نا ذریعہ اندرونی وام تا پروفائل ءِ گچین کننگ اٹ سرسہبی دوئی کرے، دا سرسہبی حکومتی سیکورٹیز نا میچورٹی ٹی ودکی، پالیسی نا کچ آن کم مارجن آ وام ودفنگ، کیپٹل مارکیٹ نا کمک اٹ نا ن بینک وریٹیل زرکاری نا کچ اٹی گچینی و بینکنگ نا بشخ انا کمک اٹ سرکاری سیکورٹیز آن وام ہلنگ آ چکار تننگ نا سوب ممکن مس۔ نگران حکومت نا مدا ٹی حکومتی سیکورٹیز نا کمک اٹ وام ہلنگ نا کچ اٹی مسکوہی دور انا مقابلہ ٹی 67 درسد کمتی بسنے، مسکوہی دور اٹی حکومتی سیکورٹیز نا کمک اٹ وام ہلنگ نا کچ 5831 ارب روپئی ریکارڈ کننگا ہرا نگران حکومت نا دور اٹی کم مرسا 1896 ارب روپئی مسر۔