کوئٹہ۔ 22 فروری (اے پی پی) چیئرمین اسٹینڈنگ کمیٹی پیٹرولیم و رسورسز و سیاسی اقتصادی امور نا ماہر سینیٹر محمد عبدالقادر اسہ خصوصی ءُ بیان اسے ٹی پارینے کہ بھاز زوت بھارت اٹی لس گچین کاریک مننگ والا ءُ، نریندر مودی بھارت نا اِرا وار وزیراعظم گچین مسنے، مودی نا ساڑی آ دورہ ءِ کشمیر اونا متشدد سیاسی مہم جوئی نا بناءِ، اونا دا دورہ غا ریاست جموں وکشمیر اٹی برانز کننگا و السی کہول آ بھلو جوان ءُ ردعمل اس مون آبس، اوپارے کہ ریاست جموں وکشمیر اٹی بھارتی وزیراعظم مودی نا برخلاف بھاز خار ءِ۔ مودی ہندو انتہاپسندآتا است آتیٹی پاکستان و مسلمان تا برخلاف خار ودی کرسا وونٹ دوئی کننگ خواہک، ہندو توا غا منحصر اونا خار انا بنداو آ کروک آ سیاست نا محور ومرکز پاکستان و کشمیر مریک، لس گچین کاری تیان مست مودی مدام سیاسی مہم جوئی نا چاگڑد ودی کننگ نا کوشست کیک، اوپارے کہ مودی تینا سیاسی مہم جوئی نا بناءِ پاکستان و کشمیر اٹی پرتشدد کارروائی تیان کرسا، چنانچہ پاکستان اٹی دہشت گردی نا کارروائی تا قوی گمان اسے، تدوک آ 25 سال آن بھارت نا سرپرستی ٹی مچ آ پاکستان اٹی خوفناک دہشت گردی مسنے، صوبہ بلوچستان آن دزگیرمروک آ بھارتی جاسوس کلبھوشن یادیو پاکستان اٹی مروک آ دہشت گردی نا بھاز بھلو شاہدی اسے۔ مودی تینا سفاکیت نا سوب آن ہم مچ آ دنیا ٹی شناخت تخک، اگہ بھارت اٹی دہشت گردی نا واقعہ اس کروئی مرے تو مودی دُن انگا واقعہ غاتیان ہم پدی مفک، چیئرمین قائمہ کمیٹی مستی پارے کہ مودی انتہاپسند آتا است آتیٹی پاکستان نا بابت خار انا جوزہ ہشکاتننگ نا پورو کوشست کیک تانکہ پاکستان نا خار اٹی انتہاپسند ہندوک اودے وونٹ ایتر و او سرسہب مرسا پاکستان وکشمیری قوم انا برخلاف سفاکانہ کارروائی کے۔ داوخت آ جموں وکشمیر اٹی 9 لکھ نا خڑک بھارتی فوج ساڑی ءُ ہرانا سوب آن مچ آ کشمیر اٹی کشمیری تا عرصہ حیات تنگ مسنے، مودی نا شیطانی ارادہ غاتے ہرسا پاکستان نا فوج ہائی الرٹ ءِ۔
