دبئی۔ 22 فروری (اے پی پی) متحدہ عرب امارات اٹی پاکستان نا سفیرفیصل نیاز ترمذی و چیف ایگزیکٹیوٹریڈ ڈویلپمنٹ اتھارٹی آف پاکستان (ٹی ڈی اے پی) محمدزبیر موتی والا پاکستان ایسوسی ایشن دبئی ٹی اڈ ہلوک پاکستان مڈل ایسٹ ٹریڈ ڈویلپمنٹ کانفرنس 2024 اٹی بشخ ہلک۔ پنچ شنبے نادے آ پاکستانی سفارت خانہ نا کنڈآن جاری بیان نا رداٹ کانفرنس نا بست وبند ءِ پاکستان نا سفارت خانہ ، ٹی ڈی اے پی و اینگرو پاکستان تین پہ تینی شریداری اٹ کریسر ۔ برجاگلف فوڈ 2024 اٹی شریک پاکستانی نمائش کنندگان و اماراتی بزنس کمیونٹی دود اٹی بشخ ہلکر۔ کانفرنس اٹی پاکستان و دے ٹک نیامی نا نیام اٹ واپاری تعلقداری تے مون آ دننگ نا وارخواہی پٹنگ کن خیال آتا تبادلہ آ چکار کننگا۔ دودانا مسخت دے ٹک نیامی ٹی پاکستانی پوریاگرآتے خاص وڑاٹ متحدہ عرب امارات نا ہلوک آتون نیٹ ورکنگ نا وارخواہی فراوان کننگ اٹ آسراتی فراوان کننگ ئس۔ سفیر فیصل نیاز ترمذی متحدہ عرب امارات اٹی پاکستانی کمپنی تیکن خاص وڑاٹ ڈیری مصنوعات، سُو، میوہ و سوزی تتون اوار اوار نا ن فوڈ گڑاتا بشخ آتیٹی وارخواہی تے مون آتخا۔ پاکستانی سفیر پارے کہ متحدہ عرب امارات نا مارکیٹ پدریسہ ودنگ ءِ ہرا زیات آن زیات فائدہ ہرفنگ کن گچین کاروباری ڈٹ تخوک آ پاکستانی کمپنی تیکن مثالی وارخواہی فراوان کیک۔ کانفرنس اٹی پینل شرہ ہم مس ہراٹی مارکیٹ نا رسینگ ءِ ودفنگ و چیلنج آتے گچین وڑاٹ نیویگیٹ کننگ کن حکمت عملی تیار کننگ آ چکار کننگا۔ دود اٹی چیئرمین الاوار لائیو اسٹاک ٹریڈنگ عبداللہ علی محمد العوار و العوار لائیو اسٹاک ٹریڈنگ نا وائس چیئرمین راسف عبدساللہ العوار ، چیف ایگزیکٹیو آفیسر پاکستان ڈیری ایسوسی ایشن ڈاکٹر شہزاد امین، ڈائریکٹر بزنس ڈویلپمنٹ اینڈ آپٹیما ئزیشن علی تنویرخان تون اوار ایلو سرکڑدہ پاکستانی پوریاگر و برآمد کنندگان آک بشخ ہلکر۔
