کوئٹہ۔ 21 فروری (اے پی پی)چیئرمین اسٹینڈنگ کمیٹی پیٹرولیم و رسورسز سینیٹر محمد عبدالقادر پارینے کہ قرآن اسہ پورو ضابطہ حیات ءِ، دا الہامی و آفاقی کتاب اٹی کائنات نا تخلیقی، اونا وسعت و تسخیر نا باندات آتیان ہلیس انسانی حیات نا غٹ پلو و اسرار و رموز بیان کننگانے، جستجو و پٹ وپول نا ہیت ءِ کننگانے، علم خصوصی وڑاٹ پوسکن آ علم انا دوئی کننگ نا ہیت کننگانے، قرآن ننا راہشونی ءِ کیک و ننے ہدایت ایتک۔ اینو نا پوسکن آ پٹ وپول، تکنیکی و سائنسی شونداری نا آئینہ حقی ماخذ قرآن ءِ، انسانیت آ لازم ءِ کہ او قرآن اٹی بیان کروک پرمان تیان کسر دوئی کے، و شعور نا بیداری ءِ قرآن ہی نا طابع تخر، دیکی قرآن اٹی ساڑی کلہو الٰہی ءِ پہہ مرسا استارتیا سرمننگ ءِ وخت اس کہ مسلمانک ہندا کلام الٰہی ٹی ساڑی کلہو الٰہیءِ دوئی کننگ کتور، داسہ وخت بسنے کہ نن قرآن نا حقی کلہو ءِ سرپند مننگ کو کوشست کین تانکہ کائنات نا اودیم خزانہ غاتسکان ننا فہم نا رسینگ ممکن مننگ کے۔ قرآن نا مننگ تون اگہ اینو ننے مغلوب ءِ و سائنسی و تیکنیکی رفعت آتیان صدی تا مسافت بریبر مرءِ تو اونا اسٹ انگا سوب ننا لاعلمی، جہالت و پوسکن آ سائنسی علم آن ناولد مننگ ءِ، قرآن دین و دنیا ٹی تفکر و تدبر نا سلہ خلکنے تانکہ ننے آ قدرت نا تخلیق آتا اسرار و رموز آشکار مننگ کے، ننا تعلیمی نظام نا سمت سہی اف، قرآن ننے جہان تا علم آن ہم گرنچ کیک چنانچہ نن قرآن ہی آن غٹ تر راہشونی تے بایدے ہلین تانکہ نن قدرت نا مشاہیر نا حقیقت ءِ پہہ مننگ کین۔ننے دیکی نا طرز آ تیان تعلیمی پنجر ءِ استوار کروئی مریک تانکہ ننا ایم فل و پی ایچ ڈی نا اسکالر زستارہ غاتیا سرمرسا ملک وقوم انا پن ءِ روشنا کننگ کیر۔ ننے تعلیمی ادارہ غاتیٹی پٹ وپول و طرز پٹ وپول آ چکار کروئی مریک۔
