کوئٹہ۔ 21 فروری (اے پی پی)چیئرمین بلوچستان بورڈ میر اعجاز عظیم بلوچ پارینے کہ مچ آ بلوچستان اٹی سالانہ امتحانک دروآن بناکرینو، امتحان تیٹی اسہ لکھ 43 ہزار آن زیات اومیتدار بشخ ہلنگ ءُ ، میٹرک نا امتحان تیکن 430 امتحانی سینٹر جوڑ کننگانے امتحانی سینٹر آتیٹی 1290 عملہ تعینات کننگانے۔ نقل انا توننگ کن ویجیلنس ٹیم جوڑ کننگانے، میٹرک نا امتحانک نہہ مارچ اسکان برجاسلرہ۔ داخیال آتا درشانی ءِ او کوئٹہ ٹی چندی امتحانی ہند آتا دورہ نا وخت آ طالب علم و استاد آتون گپ وترا ن کرسا کرے۔ داوخت آ او امتحانی ہند آتیٹی آسراتی، نقل انا توننگ نا بابت کروک آ گام گیج ، ای پیپر نا چیکنگ و ڈیجیٹل حاضری سسٹم نا جاچ ءِ ہم ہلک ، چیئرمین بلوچستان بورڈ میر اعجاز عظیم بلوچ پارے کہ نقل انا توننگ و امتحانی ہند آتیٹی آسراتی تا فراوانی کن ہرممکن گام گیج کننگک تانکہ اومیتدار آک جوان ءُ چاگڑد اسے ٹی امتحان تننگ کیر۔ نقل انا توننگ کن استاد خاص وڑاٹ لمہ و باوہ غاتے عملی گام گیج کروئی مریک تانکہ نقل کون آ ناسور ءِ ماس کش کرسا آخبت نا جوڑ کروک آتے رکھ تخنگ مرے۔ ہندا سوب آن نقل کروک آتا برخلاف سخت کارروائی کننگے دا چرجوئی ٹی ہچ ءُ رعایت اس کننگپ ۔ چیئرمین بلوچستان بورڈ میر اعجاز عظیم بلوچ مستی پارے کہ طالب علم آک تینا ذہنی لائخی تے کاریم اٹ اتسا تعلیم آ خاص چکارتخر و نقل آن خلاصی دوئی کیر۔ ہراڑآن گچین وڑاٹ ملک وقوم انا خذمت مننگ کیک۔ اوپارے کہ نقل اسہ ناسور اسے ہرا ننا پوسکن آ چین ءِ جہالت نا تہاری تیٹی بِٹنگ ءِ ۔ صوبائی حکومت و ضلعی انتظامیہ داناسور ءِ چٹفنگ کن ہرممکن کوشست کننگ ءُ۔ ہندا سوب آن راج انا غٹ بندغ آک اواری اٹ عملی جہد کرسا صوبہ نا چناتے نقل آن بچفسا اوفتے علم ان دولت آن شپ کروئی مریک، ہنداسوب آن اینو ننے دا قول کروئی ءِ کہ نقل کون آ لعنت ءِ چٹفنہ و تینا چناتے خوانفسا اسہ باشعور شاری اس جوڑکننگ اٹ اوفتا ہروڑاٹ راہشونی ءِ کینہ انتئے کہ ہندا چناتے بھلن مرسا ملک وقوم انا خذمت ءِ کروئی ءِ۔ اوپارے کہ دنیا ٹی اینو ہموقومک شونداری نا مزل آ سرمسنو۔ ہرافک تعلیم ءِ تینا سلہہ و قلم ءِ روشنائی جوڑ کرسا تینا ملک آن جہالت نا تیاری تے چٹفینو ہندا سوب آن ننے ہم تینا ملک انا شونداری و شونہالی کن علم انا شمع ءِ روشنا و تہاری تے چٹفوئی مریک انتئے کہ ہندا کوشست اٹی ننا غٹ انا سرسہبی و ملک انا شونداری نا راز ڈکوک ءِ۔
