اسلام آباد۔20فروری (اے پی پی): حالءُ اھیوال کاریءُ شنگکاری ءِ ادارکی بنجاہی وزیر مرتضیٰ سولنگی ءَ گشتگ کہ راجی اسمبلی ءِ دیوان توار کنگءَ ایچ وڑیں مھتلی یا ڈیڈ لاک نیست، آئین ءِ ردءَ گچین کاریاں پد راجی اسمبلی ءِ دیوان تاں 29 فروری ءَ توار کنگ بوت کنت، ایچ پارٹی ءِ گورءَ سادگیں بازی نیست، سیاسی گلانی نیامءَ سولءُ تران چلگءَ اَنت، آئین پاکستان ءِ تہا ہرچ وڑیں جاورھالاں چہ درآھگء ِ کشک اَست۔ سئے شمبے ءِ روچءَ مزن گسءِ ڈنءَ گوں میڈیا ءَ گپءُ تران کتگء ُ بنجاہی وزیرءَ گشتگ کہ ہما مردم کہ مردمانی ازمتاں کناں، پہ آیانی ھاترءَ توار بُرز کنگ لوٹ ایت، ہما شاعر، ازمکار، زیمل ساچ، کسمانک ساچ کہ کروڑ پتی نیاِں، آیانی ازمت منّگ لوٹاں۔ آئی ءَ گشتگ کہ است مندانی کلب آناں لوٹ ایت کہ آ اے وڑیں مردما نی ازمتاں بہ من اَنت، کسے ءَ را باسک جوڑ کنگ ءِ وہدءَ پیسہ چارگ مہ بیت۔ یک جستے ءِ پسوءَ بنجاہی وزیرءَ گشتگ کہ آئین ءِ ردءَ گچین کاری ءَ پد راجی اسمبلی ءِ دیوان تاں 29 فروری ءَ توار کنگ بیت کہ آئی ءَ تہا لھتیں روچ بچ اِتگ ۔ آئیءَ گشتگ کہ آئین پاکستان جامع ءُ تچک اِنت، اگاں سیاسی گلانی نیامءَ ایچ وڑیں تپاکی ودی نہ بوت گڈا آئین ءِ تہا ایشی ءِ واستہ ہم راہ اَست۔
