اقوام متحدہ۔ 20 فروری (اے پی پی) اقوام متحدہ نا سیکرٹری جنرل انتونیوگوتریش پارینے کہ دوحہ ٹی 2 دے ئی دیوان آن پد جہانی نمائندہ غاتا اوغانستان نا بابت گڑاس اہم باندات آتیا امنائی سلاہ مسنے ولے اڑاند آک سلوک ءُ۔ سی جی ٹی این نا رداٹ اودیوان آن پد پریس کانفرنس اٹی پارے کہ نن اوغانستان اٹی امن خوانہ، نن خوانہ کہ او اسہ وتواجہ ریاست اسے نا قول و جہانی زمواری تے پورو کننگ نا قابل مرے۔ اوپارے کہ اوغانستان نا حکومت ءِ جہانی وڑاٹ امنا کننگپک و بھاز انگا پلو آتیان جہانی ادارہ و جہانی زرگزران اٹی ضم کننگ مفک، ایلو کنڈآ جہانی کہول آ اوغانستان اٹی انسانی حق، خاص وڑاٹ زالبول و مسن تیکن بگڑینگوک آ حالیت آتا تاثر عام ءِ۔ اوپارے کہ جہانی برادری و اوغان کمامدارآتا گڑتی تے مر کننگ کن اسیجائی روڈ میپ اس تیار کننگ نا گرج ءِ۔ انتونیوگوتریش نا کماشی ٹی مروک آ دیوان اٹی چین، روس و امریکہ تون اوار 20 آن زیات ملک و جہانی تنظیم تا نمائندہ غاک بشخ ہلکر۔ دیوان اٹی اوغان کمامدارآک بشخ ہلتور۔ اقوام متحدہ نا سروک نا رداٹ اوغان کمامدارآتا کنڈآن دیوان اٹی بشخ ہلنگ کن ہرا شڑت آتے تخنگاسس او قابل قبول الورہ۔
