راولپنڈی۔ 19 فروری (اے پی پی) اینٹی نارکوٹکس فورس ممنوعہ سی بی ڈی آئل آن پُر ویپس انا آن لائن پلیٹ فارم نا کمک اٹ بہاٹی اوار نیٹ ورک نا بین الصوبائی ٹولی ءِ دزگیرکرے۔ اے این ایف ہیڈ کوارٹر راولپنڈی آن جاری بیان نا رداٹ سی بی ڈی آئل آن پُر ویپس انا برخلاف اے این ایف سرسہب آپریشن کرے و پاکستان نا 3 بھلا شار تیٹی اسہ وخت آ کارروائی کننگا۔ ویپس انا بشخنگ اٹ اوار بین الصوبائی منشیات فروش ٹولی ءِ شست کرسا 8 بندغ ءِ دزگیرکننگا۔ آپریشن اٹی چرس انا تریل آن پُر ویپس، سی بی ڈی آئل ، ٹی ایچ سی آئل، بھنگ انا نیال آن جوڑ سگریٹ رول دوئی کننگا۔ داکان بیدس چرس انا تیل، ہفیم و چرس اتون اوار ایلو غیرکانودی مواد آتے کوزہ ٹی ہلنگا۔ ترجمان پارے کہ دوبہ دار آک قدرتی گڑا و دوائی تا بہاکننگ نا آراٹی غیرکانودی سرجزآتیٹی اوار ئسر۔ ای کامرس پلیٹ فارم ءِ منشیات نا سپلائی کن کاریم اٹ اتنگا۔ دوبہ دار آک کارگو کمپنی تا کمک اٹ پیشن نا ملک آتیان ممنوعہ گڑا درآمد کریرہ۔ ترجمان پارے کہ اے این ایف آن لائن کاروبار کن حکومتی کانود و آب اٹ آپریٹنگ وڑوڈول ءِ نافذ کننگ کن کوشست کننگ ءِ۔ لمہ و باوہ ورناتیٹی ویپ انا کاریم اٹ اتنگ نا حوصلہ شکنی ءِ کیر۔ ترجمان شاری تیان خواست کرے کہ او تینا چناتا آن لائن شاپنگ پلیٹ فارم آتا کاریم اٹ اتنگ آ سخت نظر تخر۔ ہروڑنا شکبر سرگرمی تا حوال ءِ دمدستی وڑاٹ کانود نافذ کروک آ ادارہ غاتے ایتر۔
