بیجنگ۔ 19 فروری (اے پی پی) چین نا وزارت خارجہ نا ترجمان ماؤنینگ پارینے کہ پاکستان نا لس گچین کاریک عمومی وڑاٹ ، پرامن وڑاٹ مسر، و نن داڑآ پاکستانی حکومت ءِ مبارکباد پیش کینہ۔ دوشنبے نادے آ پریس کانفرنس اٹی اوپارےے کہ اسہ سنگت ہمسایہ مکل اسے نا وڑاٹ چین، پاکستانی الس نا گچین کاری نا پورو شرف ءِ کیک و پورو اومیت کیک کہ پاکستان اٹی غٹ سیاسی جماعت آک گچین کاری تیان پد سیاسی سیوت و راجی سوگوی نا اسیجائی رکھ ءِ کیرہ و قوم انا شونداری و آخبت کن اواری اٹ کاریم کیرہ۔ ماؤنینگ پارے کہ چین و پاکستان ہرچار آ موسم تا تزویراتی شریدار ءُ۔ اوپارے کہ چین، روایتی سنگتی ءِ برجاتخنگ، چندی بشخ آتیٹی عملی کمکاری ءِ پین گہراکننگ، پوسکن آ عہد اٹی پین قربت اتون چین پاکستان ہم نصیب راج انا تعمیرءِ ترند کننگ کن پاکستان تون کاریم کننگ نا چاری ءِ، تانکہ گچین وڑاٹ ہڑتوم آ ملک آتا الس ءِ فائدہ سرمننگ کے۔
