اسلام آباد۔ 19 فروری (اے پی پی) نگران بنجائی وزیر حوالکاری ، شینکاری و پارلیمانی امور مرتضیٰ سولنگی دوشنبے نادے آ سینیٹ نا ہاؤس بزنس ایڈوائزری کمیٹی نا دیوان اٹی بشخ ہلک۔ چیئرمین سینیٹ و ہاؤس بزنس ایڈوائزری کمیٹی نا باسک آک نگران حکومت و وزیرپارلیمانی امور نا سینیٹ دیوان اٹی کڑد آ منت واری ءِ ہرفیر۔ داوخت آ چیئرمین سینیٹ صادق سنجرانی پارے کہ نگران وزیر پارلیمانی امور مرتضیٰ سولنگی سینیٹ دیوان تے ہموار وڑاٹ چلیفنگ اٹ اہم کڑد ادا کرے، اوسینیٹ نا باسک آتا سوج آتے غور اٹ بِنگ و اوفتا جوانی اٹ ورندی ءِ تس ہراڑآ اونا منت وار اُن۔ نگران بنجائی وزیر حوالکاری داوخت آ گپ وتران کرسا پارے کہ نگران حکومت نا بنداوی زمواری ملک اٹی آجو، انصاف اٹ و شفاف گچین کاری کرفوئی ئسک، دامسخت کن غٹ سیاسی جماعت و ادارہ غاتا کمک درکار ئس۔ اوپارے کہ نگران حکومت غٹ سیاسی جماعت آتون اسہ وڑتعلقداری تخنگ نا کوشست کرے، اسہ جماعت اسے تون ہم پرخ کننگتنے، اونگران حکومت ءِ ہرممکن کمکاری نا فراوانی آ چیئرمین سینیٹ و سینیٹ نا باسک آتا منت واری ءِ ہرفے۔
