کوئٹہ۔ 19 فروری (اے پی پی) نگران وزیراعلیٰ بلوچستان میر علی مردان خان ڈومکی نا کماشی ٹی بلوچستان ہیلتھ کارڈ پروگرام نا کارکڑد و مون تروک ویل و مشکل آتا جاچ ءِ ہلنگ کن بڑزکو کہولی دیوان دوشنبے نادے آ داڑے چیف منسٹر سیکرٹریٹ اٹی اڈ ہلک ، دیوان اٹی نگران صوبائی وزیر جان جوڑی ڈاکٹر امیر محمدجوگیزئی، چیف سیکرٹری بلوچستان شکیل قادر خان ، پرنسپل سیکرٹری راشد رزاق خان، سیکرٹری جان جوڑی عبداللہ خان، سیکرٹری خزانہ بابر خان، چیف ایگزیکٹیو آفیسر بلوچستان ہیلتھ کارڈ پروگرام اسداللہ کاکڑ، چیئرمین بلوچستان ریونیو اتھارٹی نور بلوچ ئسک بشخ ہلکر، دیوان اٹی بلوچستان ہیلتھ پروگرام نا چیف ایگزیکٹیو آفیسر اسداللہ کاکڑ پروگرام نا بناءِ کننگ آن پد انا مسہ تُو انا کارکڑد و مون تروک چیلنج آتا بابت سرجمی اٹ حوال تس ، نگران وزیراعلیٰ بلوچستان میر علی مردان خان ڈومکی دیوان اٹی گپ وتران کرسا پارے کہ بلوچستان ہیلتھ کارڈ صوبہ نا تاریخ نا اسہ ہندن ءُ یکتا پروگرام اسے ہرانا رداٹ ہر نیزگار و ہزگار ءِ پینل آ ساڑی مچ آملک انا دُوانزدہ سد ہسپتال آتیٹی سرکاری خڑچ آتیا درمان نا آب اٹ آسراتی میسر ءِ چونکہ جان جوڑی نا بشخ اٹی تینا وڑنا دااولیکو پروگرام ءِ ہندا سوب آن لس بندغ ءِ دابابت خاطر خواہ معلومداری و فائدہ غاتا بابت علم اف انتظامی کہو ل آ ہم گڑاس ویل مون آ بننگ ءِ ولے دا ہیت است جمی نا سوب ءِ کہ وقتا فوقتا مون آ بروک آ ویل مشکل و بروک آ اڑاند آتے مر کرسا پدریسہ گچینی نا کنڈآ ٹی ءِ یقین ءِ کہ وخت گدرینگ انگ تون اوار اوار دا پروگرام اٹی گچینی بریک و آخبت اٹ الس داپروگرام آن دمدستی و گچین وڑاٹ فائدہ ہرفنگ کیک ، نگران وزیراعلیٰ پارے کہ دا ہیت است جمی نا سوب ءِ کہ بلوچستان ہیلتھ کارڈ انا رداٹ مسہ تُو اٹی 28185ناجوڑ آتا درمان ءِ کننگانے کوئٹہ ٹی غٹ آن زیات است انا مرض آتا ناجوڑ آک ہیلتھ کارڈ آن فائدہ ہرفیر، حوال نا رداٹ اندرون بلوچستان ہیلتھ کارڈ انا رداٹ غٹ آن زیات ناجوڑ آک سندھ و بلوچستان نا سنگم آ واقع حب شار انا نجی ہسپتال آتون رجوع کریر ، ہیلتھ کارڈ پروگرام اٹی شفافیت کن ڈیجیٹل سپرویژن اینڈ مانیٹرنگ سسٹم جوڑ ءِ، وخت اس کہ ہیلتھ کارڈ ایپ انا کمک اٹ ہر بندغ کن جتا وسیلہ غاتا حساب وکتاب ہربندغ نا دسترس اٹی ءِ ہرانا سوب آن ہربندغ نا شناختی کارڈ آ خڑچ مروک آ جتا وسیلہ غاتا میسج تعلقدار بندغ ناموبائل آ بریک و ہندا وڑ اسہ بندغ کن جتا وسیلہ غاتا ایلو بندغ غلط استعمال کننگ کپک، بلوچستان ہیلتھ کارڈ پروگرام نا بنائی حساب وکتاب و مالیاتی جاچ آن داہیت مون آ بسنے کہ اوغان مہاجر آتا کشنگ و ہیلتھ کارڈ انا بناغان پد نجی ڈاکٹر آک فیس آتیٹی نمان کمتی کرینو ہرا نیزگار بندغ آتیکن ریلیف اسے ، نگران وزیراعلیٰ بلوچستان پارت کرے کہ ہیلتھ کارڈ پروگرام نا بابت الس ءِ زیات آن زیات آگاہی تننگے و دارداٹ گچین تشہیر و شعوری آگاہی پروگرام نا دنگ ءِ ودفنگے تانکہ بلوچستان نا ہربندغ جان جوڑی نا بشخ اٹی تینکن جتا وسیلہ غاتا بابت معلومدار مرے و درمان کن دا پروگرام آن فائدہ ہرفنگ کے ، نگران وزیراعلیٰ بلوچستان محکمہ خزانہ ءِ پارت کرے کہ ہیلتھ کارڈ پروگرام تون منسوب انشورنس کمپنی، نادرا و پینل ہسپتال آتے سلوک آ پیسہ غاتا ادائیگی کن حسب ضابطہ آفیشل اسائمنٹ اکاؤنٹ ملنگے تانکہ مروجہ کانودی وڑوڈول نا رداٹ اوفتا ادائیگی وخت آ پک کننگ مرے و الس ءِ دا پروگرام نا رداٹ بے سلنگ آن درمان نا آب اٹ آسراتی تا چرجوئی برجاسلے۔
