اسلام آباد۔ 19 فروری (اے پی پی) نگران بنجائی وزیر حوالکاری، شینکاری و پارلیمانی امور مرتضیٰ سولنگی پارینے کہ سوشل میڈیا غا عام یوٹیوبرآتا ویور شپ زیات ءِ، پی ٹی وی ءِ سوشل میڈیا غا تینا ویور شپ ءِ ودفنگ نا گرج ءِ، ریڈیوپاکستان نا مینڈیٹ مخلوق ءِ معلومداری نا فراوانی ءِ، ریڈیوپاکستان کمرشل ادارہ اس اف ، حکومت نا رداٹ کاریم کروک آ ادارہ اسے، وزارت توانائی آن درخواست کرینن کہ ریڈیوپاکستان ءِ بجلی نا بل آتیا کمرشل ٹیرف چارج کننگپ۔ داہیت ءِ او دوشنبے نادے آ داڑے سینیٹ نا قائمہ کمیٹی حوالکاری و شینکاری نا دیوان اٹی گپ وتران کرساپارے۔ کمیٹی نا دیوان کمیٹی نا کنوینئر سینیٹر فوزیہ ارشد نا کماشی ٹی اڈ ہلک۔ دیوان اٹی کمیٹی نا باسک آتیان بیدس سیکرٹری حوالکاری و شینکاری ، منیجنگ ڈائریکٹر پی ٹی وی، ڈائریکٹر جنرل ریڈیو پاکستان و زارت حوالکاری و شینکاری نا بڑزکو کمامدارآک ساڑی ئسر۔ کمیٹی ءِ وزارت حوالکاری و شینکاری و اونا انتظامی کنٹرول اٹی کاریم کروک آ ملحقہ محکمہ غاتیٹی تجویز کروک اصلاحات آ سرجمی اٹ حوال تننگا۔ بنجائی سیکرٹری حوالکاری شاہیرہ شاہد پی ٹی وی نا مالیاتی پلان نا بابت کمیٹی ءِ حوال تس۔ کمیٹی ءِ پاننگاکہ پی ٹی وی ٹی کم وود 4100 ملازم کاریم کننگ ءُ ، پی ٹی وی آ بھلا لائبلٹی پنشن نا ئس ہرادے کنٹری بیوٹری فنڈ اٹی بدل کننگانے۔ کمیٹی ءِ مستی پاننگاکہ بجلی نا بل آتا مد اٹی پی ٹی وی ءِ دوئی مروک آ ریونیو آن پی ٹی وی نا پروگرام و ایلو خڑچ آتے پورو کننگک۔ بنجائی وزیر حوالکاری مرتضیٰ سولنگی کمیٹی ءِ پارے کہ سوشل میڈیا غا لس یوٹیوبر آتا ویور شپ بھاز زیات ءِ۔ اوپارے کہ پی ٹی وی تینا آب اٹ پروگرام تے سوشل میڈیا غاہم اپ لوڈ کننگ ءِ، پی ٹی وی ءِ سوشل میڈیا غا ویور شپ ءِ ودفنگ ناگرج ءِ۔ اوپارے کہ پی ٹی وی نا پروڈکٹ آتا پبلسٹی کن مارکیٹنگ و سوشل میڈیا مارکیٹنگ ءِ گچین کروئی مریک۔ بنجائی سیکرٹری حوالکاری کمیٹی ءِ پارے کہ ایڈیشنل سیکرٹری وزارت حوالکاری پی ٹی وی نا بورڈ آف گورنرز نا باسک مریک ، کابینہ نا منظوری آن اہل ءُ بندغ اسے ادارہ نا سروک خلنگ مریک۔ داوخت آ بنجائی وزیر حوالکاری پارے کہ نگران حکومت تون ہراتم دا باندات بس تو نن گچین ہندا تکان کہ دا کاریم ءِ گچین مروک آ حکومت آ اِلنگے، سلیکشن کن اشتہار تننگ نا مرغن ءُ پراسیس اسے ہرا نگران دور اٹی ممکن الوکہ۔
