غزہ ٹی اسرائیلی فوجی جارحیت، رفح شار آ جلہو آتا شدت نا مذمت نا بابت او آئی سی نا بیان ءِ پک کینہ، ترجمان دفترخارجہ

اسلام آباد۔ 15 فروری (اے پی پی) پاکستان پارینے کہ نن اسلامی کمکارتنظیم (او آئی سی) نا غزہ ٹی برجا اسرائیلی فوجی جارحیت و رفح شر آ اندھادھند جلہو آتا شدت نا سخت انگا لوز آتیٹی مذمت ءِ کننگ نا بابت بیان ءِ پک کینہ۔ دفترخارجہ نا ترجمان ممتاز زہرہ بلوچ پنچ شنبے نادے آ اسلام آباد اٹی پریس حوال اٹی پارےکہ اسلامی کمکار تنظیم اسرائیلی جارحیت نا رفتار اٹی گیشتری و ودکی آ خطرہ نا گھنٹی ءِ خلسا فلسطینی الس ءِ اوفتا تینا گل زمین آن زوراکی اٹ  بےاُرا کننگ نا ناقابل قبول کوشست نا برخلاف خبڑدار کرینے۔ اوپارے کہ رفح ٹی 14 لکھ بے اُرا بندغ آتا برخلاف اسرائیل نا بے رحمانہ جلہو جہانی عدالت انصاف نا عبوری پرمان اٹی بیان کروک عارضی گام گیج آتا اسُل خلاف ورزی ءِ۔ ترجمان پارے کہ پاکستان اقوام متحدہ نا سلامتی کونسل آن خواست کیک  کہ او اقوام متحدہ نا چارٹر نا رداٹ تینا زمواری تے پورو کے وجنگ بندی نافذ کننگ و فلسطینی الس نا کشت وخون ءِ بند کرفنگ کن دمدستی نیام تمے۔ اوپارے کہ نن گڑاس ملک آتا کنڈآن اقوام متحدہ نا ریلیف اینڈ ورکس ایجنسی نا فنڈنگ ءِ معطل کننگ نا فیصلہ ءِ دمدستی وڑاٹ  پدی ہلنگ نا ہم خواست ءِ کینہ۔ اوپارے کہ پین مرک و قحط آن زہمی مننگ و جوان طبی امداد نا مفننگ ءِ توننگ کن غزہ نا محاصرہ ءِ بایدے چٹفنگے۔ ترجمان پارےکہ پاکستان غزہ نا محصور الس نا تینا بدل مفروک سفارتی، اخلاقی و سیاسی وانسانی مخ تفی ٹی سنبرینگوک ءِ۔