پاکستان سلامتی کونسل نا قرارداد آتا رداٹ جموں وکشمیر نا جھیڑہ نا انصاف اٹ و پرامن ایسری کن کشمیری تا سیاسی، سفارتی و اخلاقی مخ تفی ءِ برجاتخک، ترجمان دفترخارجہ

اسلام آباد۔ 15 فروری (اے پی پی) پاکستان پارینے کہ او اقوام متحدہ نا سلامتی کونسل نا قرارداد آتا رداٹ جموں وکشمیر نا جھیڑہ نا انصاف اٹ و پرامن ایسری کن کشمیری تا سیاسی، سفارتی و اخلاقی مخ تفی ءِ برجاتخک۔ دفترخارجہ نا ترجمان ممتاز زہرہ بلوچ پنچ شنبے نادے آ  داڑے پریس حوال اٹی پارے کہ بھارت نا غیرکانودی کوزہ ٹی جموں و کشمیر اٹی اختلا ف رائے ءِ توننگ کن بھارت نا مہم زور آتیاٹی ءِ۔ اوپارے کہ 10 فروری آ بھارت نا قومی پٹ وپولی ایجنسی (این آئی اے ) چندی شار تیٹی جماعت اسلامی کشمیر نا 15 میرات آتیا چندی چھاپہ خلک، دا چھاپہ غاک کشمیری سیاسی تنظیم تا برخلاف جاری کریک ڈاؤن نا بشخ ئسر۔ ترجمان پارے کہ جماعت اسلامی دا شش سیاسی تنظیم تیان اسٹ ءِ ہرافتیا بھارت مہالو آن پابندی خلکنے۔ اوپارے کہ نن بھارتی کمامدارآ تیا زور شاغنہ کہ او کشمیری سیاسی کارندہ وجماعت آتے خلیفنگ و ظلم و ستم نا چرجوئی ءِ بند کے۔ ترجمان پاکستان نا دا خواست ءِ دُوارہ کرے کہ  غٹ کشمیری سیاسی بندی و کارندہ غاتے یلہ کننگے و جموں وکشمیر نا مخلوق ءِ تینا حق و آجوئی نا قابل کننگے۔ اوپارے کہ پاکستان اقوام متحدہ نا سلامتی کونسل نا قرارداد آتا رداٹ جموں وکشمیر نا جھیڑہ نا انصاف اٹ و پرامن ایسری کن تینا کشمیری ایلم و ایڑھ تا سیاسی، سفارتی و اخلاقی مخ تفی ءِ برجاتخک۔