اسلام آباد۔ 15 فروری (اے پی پی) نگران بنجائی وزیر داخلہ ڈاکٹر گوہر اعجاز نا کماشی ٹی پنچ شنبے نادے آ اڈ ہلوک دیوان اٹی جاڑ انگا شار راولپنڈی اسلام آباد اٹی دیر انا فراوانی، سفائی و کچرہ غاتے ٹھکانہ خلنگ نا ساڑی نظام نا جاچ ءِ ہلنگا۔ دیوان اٹی بنجائی وزیر حوالکاری مرتضیٰ سونگی خاص بشخ ہلک وخت اس کہ چیف کمشنر اسلام آباد، لوکل گورنمنٹ ڈیپارٹمنٹ، آرڈی اے و کنٹونمنٹ بورڈ انا نمائندہ غاک ہم دیوان اٹی ساڑی ئسر۔ دیوان ءِ پاننگاکہ ہشت ہزارکارندہ سفائی آ سلوک ءُ ہرا ہفت ارب روپئی نا سالانہ بجٹ اتون ہڑدے کم وود 2300 ٹن کچرہ غاتے ٹھکانہ خلیرہ ولے اوکان پد ہم ہڑتوم آ شار تیٹی فائی ءِ آب اٹ گوندنگ مفک۔ دیوان ءِ پاننگاکہ داوخت آ جاڑ انگا شارتے دیر انا 47 درسد کمتی مون تروک ءِ۔ وزیرداخلہ پارے کہ نن خوانہ کہ دارالحکومت ایلو شار تیکن روشنا درور اس مرے، دیر انا فراوانی وسفائی گرج آک ءُ ، اینو فیصلہ سازی کروئی مریک۔ اوپارے کہ مربوط ،جوان و گچین نظام اس وضع کروئی مریک تانکہ الس ءِ آب اٹ آسراتی فراوان کننگ مرے۔ وزیرداخلہ پارے کہ دارداٹ زوت آن زوت غٹ المی گام گیج آتیا عملدرآمد ءِ پک کننگے۔ اوپارے کہ بھل سفائی ءِ پک کننگ دیر انا فراوانی نا نظام نا گچینی کن المی ءِ۔ داوخت آ بنجائی وزیر حوالکاری پارے کہ ڈغار اٹی دیر انا کچ اٹی گچینی دیر انا فراوانی ٹی بھاز اہم ءِ وہنداسوب آن داکنڈآ چکار کروئی مریک۔ اوپارے کہ اسلام آباد نا قدرتی نالہ غاتا سفائی ءِ ہم پک کروئی مریک۔
