اسلام آباد۔ 14 فروری (اے پی پی) وزارت قومی جان جوڑی غٹ فارمیسی تیا فارماسسٹ نا ساڑی گری ءِ پک کننگ نا پارت کرینے، دا بابت پاکستان میڈیکل اینڈ ڈینٹل کونسل، غٹ صوبائی ہیلتھ کیئر کمیشنز، اسلام آباد ہیلتھ کیئر ریگولیٹری اتھارٹی ءِ پارت جاری کننگانے۔ وزارت جان جوڑی آن جاری بیان نا رداٹ وزارت قومی جان جوڑی بنجائی کابینہ نا فیصلہ ءِ مون آ تخسا غٹ فارمیسی تیا فارماسسٹ آتا ساڑی گری ءِ پک کننگ نا پارت کننگانے، و وٹامن، ملٹی وٹامن و کاؤنٹر آ بہامروک آ گڑاتا نسخہ غاتیا لکھنگ آن منع ہم کننگانے، دا بابت ہم پاکستان میڈیکل اینڈ ڈینٹل کونسل، غٹ صوبائی ہیلتھ کیئر کمیشنز ، اسلام آباد ہیلتھ کیئر ریگولیٹری اتھارٹی ءِ پارت جاری کننگانے و داہم پارت کننگانے کہ دا گڑاتا بہا جتاو سیلف سروس نا جاگہ غا شیلف اٹی کننگے۔ غٹ فارمیسی تیا فارماسسٹ آتا ساڑی گری ءِ پک کننگے۔ بیان نا رداٹ ڈریپ ءِ ہم پارت کننگانے کہ او دا گڑاتا رجسٹریشن/انلسٹمنٹ گچین جہانی طرز عمل نابنداوآ پک کے۔ ڈریپ غٹ صوبائی محکمہ جان جوڑی آتون دا پرمان تا نفاذ ءِ پک کننگ کن کوآرڈی نیشن نا کاریم ءِ ہم کیک۔
