لاہور۔ 14 فروری (اے پی پی) است انا مرض انا خطرہ غاتیان بچنگ و درمان کن نیشنل انفارمیشن ٹیکنالوجی بورڈ و پاکستان سوسائٹی آف انٹروینشنل کارڈیالوجی نا نیام اٹ تین پہ تینی کمکاری نا معاہدہ طے مس۔ ترجمان نا رداٹ معاہدہ نا رداٹ نیشنل انفارمیشن ٹیکنالوجی بورڈ (این آئی ٹی بی) است انا مرض آن بچنگ و ہارٹ اٹیک نا مرض انا وخت آ درمان کن آن لائن ڈیٹانا تیاری و پٹ وپول کن پاکستان سوسائٹی آف انٹروینشنل کارڈیالوجی (پی ایس آئی سی) ءِ ڈیجیٹل و ٹیکنیکل کمک فراوان کیک۔ دابابت چارشنبے نادے آ ہندی ہوٹل اٹی معاہدہ غا دستخط کن دود اس اڈتننگا۔ دود اٹی نگران بنجائی وزیر انفارمیشن ٹیکنالوجی و ٹیلی کمیونیکیشن ڈاکٹر عمر سیف بطورمہمان خاص بشخ ہلک وخت اس کہ چیف ایگزیکٹیو آفیسر نیشنل انفارمیشن ٹیکنالوجی بورڈ ڈاکٹر بابر ماجد بھٹی، صدر پاکستان سوسائٹی آف انٹروینشنل کارڈیالوجی پروفیسر ڈاکٹر زبیر اکرم، نائب صدر پروفیسر ڈاکٹر نعمان نصیر وایلوفک ساڑی ئسر۔ سی ای او نیشنل انفارمیشن ٹیکنالوجی بورڈ ڈاکٹر بابر ماجد بھٹی بنجائی وزیر ءِ دامعاہدہ نا خدوخال نا بارواٹی حوال تس وپارے کہ معاہدہ نا مسخت است انا دورہ ہلوک آمریض آتا وخت آ و جوان درمان و طبی آسراتی نا فراوانی نا چرجوئی ٹی آن لائن ڈیٹابیس اس تیار کننگ ءِ۔ اوپارے کہ است انا دورہ نا مریض آتا بنائی و ثانوی پیچیدگی تا توننگ کن دا معاہدہ بھاز کمکار جوڑ مریک ۔ دود آن تران کرسا نگران بنجائی وزیر ڈاکٹر عمر سیف این آئی ٹی بی و پپی ایس آئی سی نا دا گام انا ستاءِ کرے وپارے کہ انفارمیشن ٹیکنالوجی نا کاریم اٹ اتنگ جان جوڑی تون اوار ہر بشخ اٹی اسہ بنداوی اہمیت اس اختیار کرینے، حکومت آئی ٹی نا مون آ دننگ کن غٹ وسیلہ غاتے کاریم اٹ اتنگ ءِ۔ اوپارے کہ دااسہ جوان ءُ ڈٹ اسے ہراڑآن نہادی انسانی زند آتے بچفنگ اٹ کمک رسینگک۔ اوپارے کہ دا بابت حکومت ہرممکن کمک فراوان کیک۔ اوکان پد صدر پی ایس آئی سی پروفیسر ڈاکٹر زبیر اکرم، نائب صدر پروفیسر ڈاکٹر نعمان نصیر و سی ای او ڈاکٹر بابرمجید بھٹی ئسک نگران بنجائی وزیر آئی ٹی ڈاکٹر عمر سیف نا ساڑی گری ٹی ایم او یوآ دسخط کریر۔
