اسلام آباد۔ 10 فروری (اے پی پی) چیف آف آرمی اسٹاف جنرل سید عاصم منیر لس گچین کاری 2024 نا سرسہب اڈتننگ آ مچ آ پاکستانی قوم، نگران حکومت، سیاسی جماعت و غٹ کٹوک آ اومیتدار آتے مبارکبادی ترساپارینے کہ پاکستانی الس نا تینا حق رائے دہی نا کاریم اٹ اتنگ کن آجو و بیدس روک ٹوک آن بشخ ہلنگ، جمہوریت کن اوفتا عزم انا شاہدی ءِ۔ اللہ کے کہ دا گچین کاری سیاسی و زرگزرانی سوگوی اتے و ننا زیبا غا پاکستان کن امن و شونہالی نا مرکز جوڑ مرے۔ ہفتہ نادے آ قوم انا پن تینا کلہو اٹی چیف آف آرمی اسٹاف پارے کہ کانود نافذ کروک آ ادارہ غاتا سرکڑدہ و کارندہ غاک بے تحاشا مشکل آتیان پد ہم گچین کاری عمل کن رکھ چاگڑد اس جوڑ کننگ کن ننا غٹ آن زیات سفت نا حقدار ءُ ، قومی میڈیا، سول سوسائٹی، سول انتظامیہ و عدلیہ نا باسک آتا تعمیری کڑد قومی تاریخ نا غٹ آن بھلا گچین کاری مشق انا سرسہب اڈتننگ ءِ ممکن کرے۔ چیف آف آرمی اسٹاف پارے کہ غٹ جمہوری قوت آتا نمائندہ متحد حکومت ، پاکستان نا متنوع سیاست و تکثیریت ءِ قومی مسخت اتون گچین وڑاٹ پیش کیک۔ گچین کاری و جمہوریت پاکستان نا الس نا خذمت نا ذریعہ ءُ، قوم ءِ بے چیٹی و بشخنگ نا سیاست آن مون آ ہِننگ کن سوگو دُو و اسہ جان جوڑ عمل اسے نا گرج ءِ۔ بشخنگ نا سیاست و بے چیٹی25 کروڑ آبادی والا شون پسند ملک اکن جوان اف۔ چیف آف آرمی اسٹاف پارے کہ گچین کاری کٹنگ و باتننگ نا مقابلہ اف بلکن الس نا مینڈیٹ نا تعین ءِ کننگ نا مشق ءِ، سیاسی سرکڑدہ و اوفتا کارندہ غاتے ذاتی فائدہ غاتیان ایڑترمرسا حکومت و الس نا خذمتءِ کننگ نا کوشست آتے بایدے ہم گرنچ کننگے ہرا جمہوریت ءِ فعال و بامسخت کننگ نا اسٹ انگا کسر ءِ۔ اوپارے کہ پاکستان نا الس آئین پاکستان آ تینا اسیجائی پت ظاہر کرینے، داسہ غٹ سیاسی جماعت آتا فرض ءِ کہ او سیاسی پختگی و سیوت اٹ دانا ورندی ءِ ایتر۔ آرمی چیف است خواہی نا درشانی ءِ کرے کہ دا گچین کاری سیاسی و زرگزرانی سوگوی اتے و ننا زیباغا پاکستان کن امن و شونہالی نا مرکز جوڑ مرے۔
