اسلام آباد۔ 10 فروری (اے پی پی) دفترخارجہ نا ترجمان ممتاز زہرہ بلوچ پارینے کہ پاکستان لس گچین کاری تے پرامن و سرسہبی اٹ اڈ تسنے، سوگو و جمہوری راج انا عزم انا رداٹ گچین کاری تے اڈتننگا، لس گچین کاری تا بابت گڑاس ملک و تنظیم تا بیانک ناقابل تردید حقائق آتے گوجالرہ، انٹرنیٹ نا بندش دہشت گردی آن بچنگ کن ئس۔ ہفتہ نادے آ داڑے جاری بیان اٹی ترجمان دفتر خارجہ پارے کہ لس گچین کاری تا بابت گڑاس ملک و تنظیم تا بیان تے خنانن، دا بیان تیٹی منفی لہجہ غا حیرانی مسنے گڑاس بیان گچین کاری عمل نا پیچیدگی ءِ مون آ تخپسہ ونئے کروڑآ پاکستانی تا وونٹ انا حق انا آجو و پرجوش کاریم اٹ اتنگ ءِ امنا کیرہ، دابیانک ناقابل تردید حقیقتءِ گوجالرہ۔ ترجمان پارے کہ لس گچین کاری تے پرامن و سرسہبی اٹ اڈتسن ، درملکی سپانسر مروک دہشت گردی آن سیکورٹی ءِ مون تروک خطرہ غاتون مون تننگا۔ ترجمان پارے کہ گڑاس بیان تا حقیقت تون واسطہ اف، ملک گیر انٹرنیٹ بندش الوکہ بیرہ پولنگ نادے موبائل سروس ءِ بند کننگا تانکہ ہروڑنا دہشت گردی نا واقعہ غان بچنگ مرے۔ گچین کاری مشق دا بابت گڑتی تے غلط ثابت کرینے، پاکستان تینا قول انا رداٹ اسہ سوگو و جمہوری راج اسے نا ٹہیفنگ کن گچین کاری تے اڈتسنے۔ ترجمان پارے کہ نن تینا سنگت آتا کنڈآن تعمیری تنقید ءِ قدر انا نظر اٹ ہرنہ، گچین کاری عمل نا پوروی آن مست منفی بیان نئے تو تعمیری و نئے بامسخت۔ ترجمان پارے کہ پاکستان متحرک جمہوری سیاست کن تینا کاریم ءِ برجاتخک۔ ہر گچین کاری و اقتدار نا پرامن منتقلی ننے دا مزل آن پین خڑک کیک۔ اوپارے کہ نن دا کاریم ءِ پین اسٹ نا گڑتی تا سوب آن کتون بلکن تینا الس نا است خواہی و ننا بانی تا وژن نا رداٹ کننگ اُن۔
