اسلام آباد۔ 10 فروری (اے پی پی) صدر مملکت ڈاکٹر عارف علوی پارینے کہ پاکستان و چین نا نیام اٹ گہرا تعلق دنیا کن دروراسے۔ پاکستان و چین نا سنگتی نا ماسک الس اٹی پیوست ءُ ہرافتا بنداو امن و کمکاری تون اوار اوار ہڑتوم آ کنڈآتا تین پہ تینی تعلقداری آ تالان ءِ۔ چین نا سرکاری میڈیا ءِ تروک آ انٹرویو ٹی اوپاکستانی الس و حکومت نا کنڈآن پوسکن آ چینی سال آ نیک است خواہی نا درشانی ءِ کرساپارینے کہ ہڑتوم آ ملک آک غٹ اہم امور آ اسہ ایلو نا فائدہ غاتا شرف ءِ کرسا اونا رکھ اکن کوشست کرینو۔ پدریسہ بدل مروک آ دنیا ٹی پاک چین تعلقداری سوگو ءِ، امن و کمکاری نا جوزہ ہڑتوم آکنڈآتا سوگو تعلقداری ءِ ظاہر کیک، ہڑتوم آ ملک آک اسہ ایلو نا کوشست آتا مخ تفی ءِ کیرہ۔ اوپارے کہ آئی ٹی، کشت وکشار، گاڈی تا تیاری تون اوار ایلو بشخ آتیٹی کمکاری ءِ ودفنگ انگ ءِ۔ چینی مصنوعی ذہانت تون اوار ایلو بشخ آتیٹی غٹ آن مون آٹے۔ اوپارے کہ نن تنکی ناوخت آ اسہ ایلو تون سلنہ، دنیا نا چندی علاقہ غاتیٹی تنازعہ ارے و کیہی دیکی ملک آک مون آ بروک زرگزران تا شونداری ءِ زہمی کننگ کن کوشست کننگ ءُ۔
