اسلام آباد ۔ 10 فروری (اے پی پی) نگران وزیراعظم انوارالحق کاکڑ پارینے کہ لس گچین کاری 2024 نا نتیجہ غاتیان دا پاش مریک کہ گچین کاریک بحیثیت جم آجو و انصاف اٹ مسنو، نن پاکستان نا زرگزرانی سوگوی و پوسکن آحکومت نا سرسہبی کن دعا کینہ، مواصلات نا بندش بیرہ دہشت گردی نا واقعہ غاتا توننگ کن ئس، دا گام انا ہچ ءُ سیاسی مسخت اس الوکہ۔ تدوک آ دے ٹی آر ٹی ءِ تروک آ انٹرویو ٹی نگران وزیراعظم انوارالحق کاکڑ پارے کہ اقتدار ءِ دوٹی تننگ نا اختیار پارلیمان نا ءِ، ہموڑے ہراسٹ کہ درکار نمبر آتے پورو کیک اقتدار ءِ ہمو سنبھالک۔ گچین کاری تیکن پولنگ نادے انٹرنیٹ و مواصلاتی بندش نا بابت سوج انا ورندی ٹی اوپارے کہ لس گچین کاری تیان بیرہ اسہ دے اس مست بلوچستان اٹی اِر ادہشت گرد جلہو مس ہرانا مسخت جمہوری عمل ءِ زہمی کننگ ئس۔ سیکورٹی ادارہ غاتا کنڈآن ہم ہندن ءُ حوال آک ئسر کہ دا چرجوئی بیرہ اِر اصوبہ غاتسکان محدود سلپک، ننا کاریم الس ءِ سیکورٹی تننگ ئس، نن تینا الس نا جون تے خطرہ ٹی شاغنگ کتونہ۔ مواصلاتی بندش نا مسخت دہشت گرد آتے اوفتا ناپاک مسخت آتیان اسہ کنڈ کننگ ئس، دانا مسخت ہچ وڑنا سیاسی نیام تمنگ الوکہ، دا گام آن الس ءِ پرامن وڑاٹ تینا حق رائے دہی ءِ کاریم اٹ اتنگ نا پبی موقع دُوبس و اوبے خوف و خلیس آجو چاگڑد اٹ تینا وونٹ انا حق ءِ کاریم اٹ ایسر، پاکستان نا الس نرزور و سنبرینگوک ءِ۔ اوپارے کہ بٹوک آ وونٹ آتا گڈیکو کچ انا بارواٹی گڑاس پاننگ ءِ کہ داسکان وخت آن مست ءِ، ولے مخلوق نا بھاز بھلو کچ اس وونٹ بِٹنگ کن پیشن پیش تمانے ، کنے خوشی مریک اگہ دا ٹرن آؤٹ 40 آن 50 درسد مریک۔ اوپارے کہ ہراوڑ نتیجہ غاتا پاننگ ءُ، داڑآن ساف ظاہر ءِ کہ لس گچین کاریک بحیثیت جم آجو و انصاف اٹ مسنو۔ اواسہ سوج اسے نا ورندی ٹی پارے کہ 2002 آن پد سیاسی و جمہوری وڑاٹ انت کہ بدلی اس مس او پارلیمان آن ہی مس، عمران خان نا برخلاف بے پتی ہم فلور آف دی ہاؤس مس، داوڑنا جمہوری سرگرمی ءِ نیام تمنگ اسے تون گنڈنگ مفک۔ دا جمہوری عمل نا بشخ ءِ داڑآ تنقید سہی اف۔
