کوئٹہ۔ 08 فروری (اے پی پی) مچ آ ملک آنبار بلوچستان اٹی ہم الیکشن 2024 کن پولنگ نا عمل پرامن وڑاٹ پورو مس پولنگ سہب انا 8 بجہ غان ہلیس بیگہ نا 5 بجہ اسکان بے سلنگ آن برجائس ، داوخت آ سیکورٹی نا بے کچ سخت بست وبند کننگا ہراٹی مخلوق نا بھلو کچ اس بشمول بزرگ و زالبول آک تینا حق رائے دہی ءِ کاریم اٹ اتنگ کن پولنگ اسٹیشن آ سرمسر جم وڑاٹ مچ آ صوبہ ٹی الیکشن نا بابت ہچ ءُ بھلو ناخوشگوار واقعہ اس پیش بتنے، پشین و قلعہ سیف اللہ دھماکہ غاتیان پد فضاسوگوار ئس ولے مخلوق نا بھلو کچ اس گچین کاری عمل اٹی بشخ ہلکر اوکان پد اومیت کننگ مریک کہ ٹرن آؤٹ تدوک آگچین کاری تیان زیات مریک ، وزیراعلیٰ بلوچستان میر علی مردان ڈومکی مچ آ صوبہ ٹی پرامن گچین کاری تا اڈتننگ آ است جمی نا درشانی ءِ کرسا پارے کہ بلوچستان نا الس لس گچین کاری تا جمہوری عمل اٹ پبی بشخ ہلسا ساف و شفاف گچینی نا کمک اٹ تینا پارلیمانی نمائندہ غاتا گچین کاری ٹی بھاز است خواہی ظاہرکریر و اجتماعی سیاسی شعور نا شاہدی ءِ تسر ، مچ آ بلوچستان اٹی پولنگ اٹی ہچ ءُ بھلو ناخوشگوار واقعہ اس پیش بتنے ہرا نگراں صوبائی حکومت و غٹ سیکورٹی ادارہ غاتا گچین حکمت عملی نا درشانی ءِ ۔ اولس گچین کاری تیٹی بحالی امن کن سول فورس آتا کمکاری کن پاک فوج و ایف سی نا کڑد انا ستاءِ کرسا کمانڈر 12 کور لیفٹیننٹ جنرل راحت نسیم احمد خان آئی جی ایف سی نارتھ و ساؤتھ کن نیک است خواہی نا درشانی ءِ کریر وزیراعلیٰ بلوچستان ہیڈ کوارٹر ز ایف سی ٹی جنرل الیکشنز نا سیکورٹی بست وبند آتیکن جوڑ کروک الیکشنز سیل نا اجاچ ءِ ہلک و گچین سیکورٹی بست وبند آتیا است جمی نا درشانی ءِ کرسا پارے کہ صوبہ ٹی قیام امن اٹی آرمی وایف سی نا اہم ءُ کڑ داسے ، نگراں صوبائی وزیرحوالکاری جان اچکزئی بلوچستان اٹی لس گچین کاری تا پرامن اڈتننگ آالس ءِ مبارکبادی ترسا پارے کہ سیکورٹی فورس آتا قربانی تا سوب آن پرامن وڑاٹ الیکشن آک اڈ ہلکر، بلوچستان آن قومی اسمبلی نا 16 نشست آتیکن 429 وخت اس کہ صوبائی اسمبلی نا 51 حلقہ غاتیا اسہ ہزار 267 اومیتدار میدان اٹی ئسر۔ مچ آ صوبہ غان 53 لکھ 71 ہزار 947 رجسٹرووٹر آتے حق رائے دہی ءِ کاریم اٹ اتوئی ئس۔ ہرافتے ٹی نرینہ ووٹرآتا کچ 30 لکھ 16 ہزار 164 وخت اس کہ زالبول ووٹرآتا کچ 23 لکھ 55 ہزار 783 ئس۔ بیلٹنگ کن 5 ہزار 26 پولنگ اسٹیشن جوڑ کننگا۔ الیکشن کمیشن نا کنڈآن اسہ ہزار 651 پولنگ اسٹیشن تے بے کچ حساس وخت اس کہ 2 ہزار 249 ءِ حساس گوندنگاسس۔ 51 ہزار 379 پولنگ اسٹاف گچین کاری عمل اٹی بشخ ہلکر۔ پولنگ بیگہ نا 5 بجہ اسکان بے سلنگ آن برجائس۔ الیکشن سیکورٹی کن پولیس، ایف سی، بی سی ، لیویز و 12 کور نا 66 ہزار 214 ورناتعینات ئسر۔ شفاف گچین کاری تا اڈتننگ کن صوبائی الیکشن کمیشن اٹی کنٹرول روم اس ہم جوڑ کننگا۔
