اسلام آباد۔ 08 فروری (اے پی پی) نگران وزیراعظم انوارالحق کاکڑ لس گچین کاری 2024 نا سرسہب اڈتننگ آ قوم ءِ مبارکبادی پیش کرسا پارے کہ دعاءِ کہ دا الیکشن پاکستان نا روشنا و شونہال آخبت نا روشنائی جوڑ مرے۔ پنچ شنبے نادے آ تینا اسہ ٹویٹ اسے ٹی وزیراعظم پارے کہ گچین کاری تا سرسہب اڈتننگ آ مچ آ قوم انا است انا حب اٹ منت واری ءِ ہرفیوہ، ای الیکشن کمیشن آف پاکستان ، نگران صوبائی حکومت، سلہہ بند فوج، سول آرمڈ فورس، پولیس، کانود نافذ کروک آ ادارہ، گچین کاری عملہ، میڈیا ودا غٹ ادارہ و بندغ آتا کوشست آتا ستاءِ کیوہ ہرافک آجو و انصاف اٹ گچین کاری تا اڈتننگ اٹ کڑد ادا کریر۔ وزیراعظم پارے کہ دااہم موقع نئے بیرہ ننا جمہوری عمل نا سوگوی و محکم بلکن پاکستانی الس نا ناقابال تسخیر جوزہ نا ہم شاہدی ءِ۔ اوپارے کہ پاکستان نا الس نا بشخ ہلنگ و جوش و خروش دا جمہوری عمل نا بنداو مسنے ، ووٹرآتا زیات ٹرن آؤٹ ننا ملک انا آخبت کن السی عزم انا پیدوار اشارہ ءِ۔ اوپارے کہ وونٹ انا کمک اٹ حق رائے دہی نا درشانی آن ننا جمہوریت سوگو مریک و داڑکن پاکستانی الس تحسین نا حقدار ءُ۔ وزیراعظم پارے کہ خیبرپختونخوا و بلوچستان اٹی دہشت گردی نا منہ واقعہ غاتیان پد ہم مچ آ ملک اٹی آجو و انصاف اٹ گچین کاری تا اڈتننگ کن سلہہ بند فوج، سول آرمڈ فورس، ایل ای اے، سویلین ایڈمنسٹریشن و الیکشن کمیشن آف پاکستان نا کوشست سفت نا قابل ءُ۔ وزیراعظم پارے کہ پاکستانی الس مشکل آتون مون ترسا بھلو ہمت و عزم انا درشانی ءِ کرینو، دہشت گردی نا ساڑی آ واقعہ غاتیان پد ہم الس نا جوزہ و گچین کاری عمل اٹ اوفتا بشخ ہلنگ ننا ملک ءِ نزوری آن دوچار کننگ کن سرگرم واکدار آتا برخلاف اسہ واکدار ءُ بیان اسے۔ اوپارے کہ داامن، سوگوی و شونہالی کن ننا اجتماعی است خواہی نا عکاسی ءِ کیک۔ وزیراعظم پارے کہ اسہ وارولدا ای دا تاریخی سرسہبی آ قوم ءِ مبارکبادی ایتیوہ ، دعاءِ کہ دا الیکشن پاکستان نا روشنا و شونہال آخبت نا روشنائی جوڑ مرے۔
