قومی گچین کاری تیٹی بزرگ، زالبول ووٹر آک پولنگ نا بناآ وونٹ بِٹنگ کن پرجوش

 اسلام آباد۔ 08 فروری (اے پی پی) مچ آملک اٹی ووٹنگ نا وخت  بناکننگ تون زیات تر بزرگ و زالبول ووٹرآک پولنگ اسٹیشن تیا تینا حق رائے دہی ءِ کاریم اٹ اتنگ نا بابت زیات پرجوش خننگ انگ ءُ، الیکشن اٹ فعال وڑاٹ بشخ ہلسا معذور و بزرگ شاریک ووٹنگ اٹی بشخ ہلنگ ءُ۔ اسہ 70 سال انا زالبول اس پی ٹی وی نیوز چینل تون گپ وتران کرسا پارے کہ ’’ای تینا وونٹ ءِ بِٹنگ و آخبت نا حکومت نا جوڑ کننگ کن گچین کاری عمل نا بشخ مننگ کن 8 فروری نا لس گچین کاری تا دے انا بے صبری اٹ انتظار ءِ کریٹہ۔ پولنگ نا سہب پولنگ اسٹیشن تیا زیات تر نیم وئی و بزرگ آ بندغ آک خننگ انگ ءُ۔ رپورٹ نا رداٹ پنجاب سٹی نا پولنگ  اسٹیشن نا اسہ ایجنٹ اس پارے کہ بزرگ ووٹرآتیان زیات تر ءِ اوفتا چنا، رشتہ دار و عزیز تے ووٹنگ ہند اسکان دننگ ءُ۔ اوپارے کہ سہب آن بزرگ ووٹرآتا زیات سرگرمی خننگ انگ ءِ۔ اسہ 50 سال انا بندغ اس پارے کہ او وئی و جان جوڑی نا ویل آتیان پد ہم ذاتی وڑاٹ تینا وونٹ انا حق ءِ کاریم اٹ اتنگ کن سنبرینگوک ءِ۔ سندھ اٹی پولنگ اسٹیشن نا پیشن سلوک اسہ پین پیر ءُ نیاڑی اس پارے کہ ای پولنگ اسٹیشن آ ہنسا وونٹ بِٹنگ خواوہ۔ راولپنڈی پولنگ اسٹیشن نا کنڈآ ہنوک اسہ ٹیچراس پارے کہ وئی دُن ءُ باندات اس اف ہراکس اسے پولنگ سینٹرآ ہِننگ آن تورے۔ کنا لمہ تینا وونٹ ءِ کاسٹ کرینے ۔ اوپارے کہ نم ہم تینا وونٹ ءِ شاغبو۔