حیدر آباد۔ 06 فروری (اے پی پی) لس گچین کاری تیٹی قومی اسمبلی نا حلقہ این اے 209 سانگھڑ1 ون آ پاکستان پیپلزپارٹی نا اومیتدار مسکوہی بنجائی وزیر و مرکزی حوالکاری سیکرٹری پی پی پی شازیہ عطامری و فنکشنل مسلم لیگ نا پندار اومیتدار و ایم کیو ایم تون اوار چندی جماعت آتا مخ تف اومیتدار مسکوہی ایم این اے و پیپلزپارٹی آن کسرتے جتا کرسا جی ڈی اے ٹی شمولیت اختیار کروک آ اومیتدار محمد کان جونیجو نا نیام اٹ ون ٹوون و سخت مقابلہ مریک۔ داعلاقہ ٹی ہڑتوم آ اومیتدار آتا پوزیشن بھاز سوگو نظر بننگ اٹی ءِ۔ دا حلقہ اولیکو دے آن فنکشنل مسلم لیگ نا مرکز مسنے وخت اس کہ الیکشن اٹی شازیہ مری حلقہ غان پیپلزپارٹی نا اومیتدار نا وڑاٹ اولیکو وار تینا جماعت ءِ دا سیٹ ءِ ترفیسس۔ دا حلقہ ٹی داوار ہم سخت مقابلہ نا گمان ءِ۔ قومی اسمبلی نا دا حلقہ غا کل ووٹرآتا کچ 607638 ءِ ہراٹی زالبول ووٹرآتا کچ 281283 و نرینہ ووٹرآتا کچ 326355 ءِ۔ داڑے جم وڑاٹ 442 پولنگ اسٹیشن جوڑ کننگک۔ ایڑے رابطہ کننگ آ ’’اے پی پی‘‘ تون گپ وتران کرسا شازیہ عطامری پارے کہ نن داڑے اچھڑوتھرتون اوار شاری علاقہ غاتیٹی الس ءِ ہمو غٹ بنداوی آسراتی تے فراوان کرینن ہراتدوک آ 70 سال اٹی تننگتویسس وخت اس کہ لس گچین کاری تیٹی سرسہبی آن پد ضلع نا الس ءِ ہسپتال نا ٹیکی اس ہم ایتنہ۔ ایلو کنڈآ جی ڈی اے نا اومیتدار محمد خان جونیجو نا پاننگ ءِ کہ اگہ نن حکومت اٹ بسن تو داڑے شونداری کاریم تا جال اس تالان کینہ۔
