اسلام آباد۔ 06 فروری (اے پی پی) الیکشن کمیشن آف پاکستان اومیتدار و سیاسی جماعت آتا چکار ءِ کرفینے کہ او سے شنبے و چارشنبے نا نیامی نن نا 12 بجہ غان مست تینا گچین کاری مہم ءِ چٹفر۔ دوشنبے نادے آ الیکشن کمیشن آن جاری بیان نا رداٹ الیکشن کمیشن لس گچین کاری 2024اٹی بشخ ہلوک آ غٹ اومیتدار و سیاسی جماعت آتے مطلع کرے کہ الیکشنز ایکٹ انا سیکشن 182 نا رداٹ اینو 6 فروری نا نن 12 بجہ غان پد اسہ بندغ اس ہم جلسہ، جلوس، کارنرمیٹنگ یا داوڑنا سیاسی سرگرمی اس نئے تو اڈایتک و نئے اوٹی بشخ ہلیک۔ ہرکس کہ کانود نا ہندا بڑزکو شق انا خلاف ورزی ءِ کیک اونا برخلاف کانودی کارروائی کننگک۔ ہندا بڑزکو وخت آن پد الیکشن کمپین ، اشتہار و ایلو نوشتہی مواد آتا الیکٹرانک و پرنٹ میڈیا غا تشہیر آ پابندی ءِ ہراڑآن خاص ءُ سیاسی پارٹی یااومیتدار اسے نا مخ تفی یا مخالف نا شبہ مرے۔ داکان بیدس گچین کاری عمل نا اڈتننگ اسکان میڈیا غا ہروڑنا پول سروے آ ہم پابندی مریک۔ میڈیا پولنگ نا ایسر نا اسہ گھنٹہ اس گدرینگ انگ آن پد رپورٹنگ رزلٹ نا نشریات نا بناءِ کننگ کیک ہراڑآن دا پیدوار وڑاٹ پاننگک کہ دا رزلٹ غیرحتمی و غیرسرکاری ءِ۔ ریٹرننگ آفیسرز پولنگ اسٹیشن تا پروگریسیورزلٹ و پورو غیرحتمی رزلٹ جاری کیک۔ الیکٹرانک و پرنٹ میڈیا کوڈ آف کنڈکٹ آ سختی اٹ عمل کیک و خلاف ورزی آ پیمرا و پی ٹی اے ءِ کانودی کارروائی کننگ نا پارت جاری کننگانے۔
