اسلام آباد۔ 06 فروری (اے پی پی) نگران بنجائی وزیر حوالکاری، شینکاری و پارلیمانی امور مرتضیٰ سولنگی پارینے کہ پاکستان نا 12 کروڑ آن زیات الس 8 فروری آ تینا نمائندہ غاتا گچین کننگ کن تینا حق رائے دہی ءِ کاریم اٹ اتیرہ۔ سے شنبے نادے آ نگران وزیر داخلہ ڈاکٹر گوہر اعجاز تون اوار پریس کانفرنس آن تران کرسابنجائی وزیر حوالکاری پارے کہ تدوک آ سال 17 اگست 2023ء آ نگران کابینہ نا سوغند ہرفنگ آن بروک آ دے تینا اولیکو پریس کانفرنس اٹی پاریسس کہ آئین نا آرٹیکل (3)218نا رداٹ الیکشن کمیشن اسٹ انگا آئینی ادارہ ءِ ہرا آجو، شفاف و بے کنڈ ہلوک گچین کاری کرفنگ ءِ و نگران حکومت گچین کاری تا اڈتننگ اٹ الیکشن کمیشن نا ہرممکن کمک ءِ کیک۔ اوپارے کہ نگران حکومت نا پنچ تُو انا وخت اٹی گچین کاری تا بابت بھاز انگا قیاس آرائی کرسا کننگاولے دا غٹ قیاس آرائی تیان پد ہم 8 فروری آ گچین کاریک تینا شیڈول نا رداٹ مننگ ءُ۔ بنجائی وزیر حوالکاری پارے کہ گچین کاریک پرامن مریرہ و داڑکن غٹ بست وبند آتے کننگ انگ ءِ۔ گچین کاری تیٹی ہندی و جہانی صحافی و درملکی مبصر آتا آسراتی کن تدوک آ دے وزارت حوالکاری اسہ آن لائن میڈیا ہیلپ لائن اسے نا ہم بناءِ کرینے۔ اوپارےکہ پاکستان نا آئین نا دیباچہ ٹی نوشتہ ءِ کہ دا ملک ءِ اونا گچین مروک آ نمائندہ غاک چلیفرہ و انشاء اللہ 8 فروری آ پاکستان نا 12 کروڑ آن زیات الس تینا نمائندہ غاتے گچین کیرہ ۔ اسہ سوج اسے نا ورندی ٹی بنجائی وزیر حوالکاری پارے کہ 2008ء و 2013ء نا گچین کاری تیٹی سیکورٹی حالیت خراب ئس، 2008ء ٹی بینظیر بھٹو نا شہیدی آن پد گچین کاری تیٹی اسہ تُو انا تاخیرمس۔ اوپارے کہ پاکستان نا الس دہشت گردی نا برخلاف بھلو وخت اسے آن جنگ تننگ ءُ، و اوفتا حوصلہ شیف تمتنے، منہ واقعہ پاکستانی الس ءِ توننگ کپسہ، انشاء اللہ الس 8 فروری آ تینا نمائندہ غاتا گچینی کن پیشن پیش تمرہ و تینا وونٹ انا حق ءِ ضرور کاریم اٹ اتیرہ۔
