اسلام آباد۔ 06 فروری (اے پی پی) نگران بنجائی وزیر داخلہ و واپار ڈاکٹر گوہر اعجاز پارینے کہ نگران حکومت تینا غٹ زمواری تے جوان وڑاٹ پورو کے، پرامن، ساف و شفاف گچین کاری تا اڈتننگ آ ہچ ءُ سمجھوتہ اس مفک، 8 فروری آ مروک آلس گچین کاری تیٹی 12 کروڑ آن زیات ووٹر حق رائے دہی ءِ کاریم اٹ اتیرہ۔ اوسے شنبے نادے آ نگران بنجائی وزیر حوالکاری وشینکاری مرتضیٰ سولنگی و بنجائی سیکرٹری داخلہ آفتاب اکبر درانی تون اوار پریس کانفرنس آن تران کریکہ۔ نگران وزیرداخلہ ڈاکٹر گوہراعجاز پارے کہ سندھ انا تہہ ٹی گچین کاری تا تیاری ترندی اٹ برجاءِ، ہراپارٹی سندھ اٹی گچین کاری تیٹی بشخ ہلنگ ءُ او سال آتیان اسہ ایلو ءِ چارہ، سیکورٹی ادارہ و ایڈمنسٹریشن ساڑی ءُ، کس اس کانود ءِ تینا دوٹی ہلنگ کپک۔ بلوچستان نا رپورٹ تینا الیکشن سیل اٹی ہلک، ننے دا فورس آتیان خطرہ ءِ ہرا ملک اٹی نزوری ودی کننگ خوارہ، سیکورٹی کن ننا پولیس اونا پد اٹ آرمڈ فورس ءِ، ننا آرمی نا ٹرینڈ کمانڈوز بلوچستان اٹی ساڑی مریرہ۔ اوپارے کہ ننے باجوڑ واقعہ غاہم بھاز تکلیف مس، ننے خلیفنگ کن مچ آ نقل و حرکت کننگاکہ، پاکستان نا پن و عزت ننا و میڈیا نا دوٹی ءِ، 25 کروڑ الس نا امانت میڈیا تون ءِ، نیت صاف مرے تو اللہ سرخرو کیک، نگران حکومت ہرا کاریم ءِ کرے او نما مون آٹی ءِ ۔ نگران وزیر داخلہ گوہر اعجاز مستی پارے کہ 44 ہزار پولنگ اسٹیشن تے نارمل ڈکلیئرکرینے و 20985 پولنگ اسٹیشن ءِ حساس و 16766 پولنگ اسٹیشن تے بھاز حساس گوندانے، 2018 ٹی چندی واقعہ غاتیٹی 666 مرک مسوسس ، کوشست ءِ داوار ہچ ءُ جانی نسخان اس مف۔
