راولپنڈی۔ 06 فروری (اے پی پی) اینٹی نارکوٹکس فورس (اے این ایف) منشیات اسمگلنگ نا برخلاف 11 کارروائی تیٹی 724 کلوگرام منشیات دوئی کرسا 9 دوبہ دار آتے دزگیرکرے۔ اے این ایف ترجمان نا رداٹ اسلام آباد بالی پٹ آن شارجہ غا ہنوک آ مسافر آن 746 گرام چرس دوئی کننگا وخت اس کہ اسلام آباد بالی پٹ آن دبئی آ ہنوک آمسافر آن 91 ہیرون آن پُر کیپسول دوئی کننگا۔ کراچی بالی پٹ آ چین آ ہنوک آ اِرا مسافر آتیان 159 گرام چرس دوئی کننگانے۔ سیال ایئر کارگوآفس سیالکوٹ اٹی پارسل اسے آن 500 گرام آئس دوئی کننگا۔ نوکنڈی چاغی آن 295کلوہفیم و 7 کلو گرام چرس دوئی کننگا، اورکزئی آن 97 کلو گرام چرس دوئی کننگا۔ بشارت روڈ پشاور آن 120 کلوگرام چرس و 72 کلوگرام ہفیم دوئی کرسا دوبہ دار آتے دزگیرکننگا۔ لکپاس ٹول پلازہ کوئٹہ نا خڑک 2 دوبہ دارآتیان 65 کلوگرام چرس و 8 کلو گرام آئس دوئی کننگا۔ چکری ٹول پلازہ راولپنڈی نا خڑک 27 کلوگرام چرس و 26 کلوگرام ممنوعہ مواد دوئی کننگا۔ ایم ون موٹروے اسلام آباد آن اِرا جتا کارروائی تیٹی اِرادوبہ آتیان 6 کلوگرام چرس دوئی کننگا۔ ترجمان پارے کہ دزگیر دوبہ دار آتا برخلاف انسدادِ منشیات ایکٹ نا رداٹ مقدمہ درج کرسا جاست وپاست نا بنا ءِ کننگانے۔
