اوٹاوا۔ 06 فروری (اے پی پی) کینیڈا ٹی پاکستان نا ہائی کمشنر ظہیر احمد جنجوعہ جہانی برادری آ زور شاغانے کہ او بھارت نا غیرکانودی کوزہ ٹی جموں وکشمیر اٹی بھارت نا کنڈآن انسانی حق انا بھلو کچ اسے آ خلاف ورزی تے تورفنگ، اسہ کنڈی و غیرکانودی گام گیج آتے پدی ہلنگ و اقوام متحدہ نا منظور کروک 13 قرارداد آتیا عملدرآمد کرفنگ اٹ کڑد اداکے۔ سے شنبے نادے آ اوٹاوہ ٹی پاکستانی ہائی کمیشن نا کنڈآن جاری پریس ریلیز نا رداٹ او کینیڈا نا دارالحکومت اوٹاواٹی پاکستانی ہائی کمیشن و ٹورنٹو، وینکوور و مونٹریال اٹی پاکستان نا 3 قونصل خانہ غاتا کنڈآن یوم یکجہتی کشمیر نا دود آتا وخت آ تینا ویڈیو کلہو اٹی پارے کہ جموں وکشمیر داسہ ہم ہمو ڈیہہ ءِ ہراڑے غٹ آن زیات کچ اٹی فوجی دستہ تعینات ءِ۔ پاکستان ہائی کمشنر عکسی نمائش نا بناءِ ہم کرے ہراٹی پاکستانی پردیسی تا اسہ بھلو کچ اس بشخ ہلکر۔ عکس آتیٹی کودک کشمیری تیا بھارتی ظلم و جارحیت ءِ تالان کننگا۔ پاکستانی ہائی کمیشن و 3 قونصل خانہ غاک یوم یکجہتی کشمیر نا بابت چندی پروگرام تا اڈ تسر ہراٹی عکسی نمائش، سیمینار، دستاویزی فلم آتا اسکریننگ، برانزی مچی و میڈیا تون گپ وتران نا بست وبند کننگا تانکہ بھارت نا غیرکانودی کوزہ ٹی جموں وکشمیر اٹی انسانی حق انا خلاف ورزی تے تالان و کشمیری تتون یکجہتی نا درشانی ءِ کننگ مرے ہرا بدترین ظلم و جور اتون مون تننگ ءُ۔
