جنیوا۔ 02 فروری (اے پی پی) جنیوا ٹی اقوام متحدہ ٹی پاکستان نا آخبتی مشن ءِ جہانی 9 می جنیوا انگیج ایوارڈ اٹی ‘سوشل میڈیا انگیجمنٹ’ کیٹیگری ٹی اولیکو پوزیشن ءِ تننگانے۔ ڈپلومیٹک فاؤنڈیشن (سوئس ۔مالٹیز غیرسرکاری تنظیم) نا کنڈآن پاکستان نا آخبتی مشن ءِ جہانی 9 می جنیوا انگیج ایوارڈ زاٹی ‘سوشل میڈیا انگیجمنٹ’ کیٹیگری ٹی اولیکوپوزیشن ءِ تننگا۔ جنیوا ٹی پنچ شنبےنادے آ اڈ ہلوک دود اٹی پاکستان نا سفیر و اقوام متحدہ ٹی آخبتی نمائندہ بلال احمد ایوارڈ ءِ ہلسا ایوارڈ ءِ مشن اٹی تینا ٹیم انا خواری و اوفتا پیشرو و بیجنگ اٹی پاکستان نا سفیر خلیل ہاشمی نا پن آکرے۔ سفیر بلال احمد السی و ڈیجیٹل سفارت کاری نا بشخ اٹی پاکستان نا دفترخارجہ نا وقف و آخبتی کوشست آتا ستاءِ کرے ہرانا مثبت و است بڈ نتیجہ دوئی مننگ ءِ۔ اوپاکستان نا مشن ءِ اعزاز تننگ آ ڈپلومیٹک فاؤنڈیشن نا منت واری ءِ ہم ہرفے۔ جنیوا انگیج ایوارڈز جنیوا و مچ آ دنیا نا کمیونٹی تا نیام اٹ فعال رابطہ غاتے امنا کیک ہرا چاگڑدی بدلی، انسانی حق ، شونداری و ہجرت تون اوار پالیسی تیان زہمی مریرہ۔ 2002 ٹی جوڑ کروک، ڈپلومیٹک فاؤنڈیشن کمامدارآتے تربیت ترسا و انٹرنیٹ گورننس ، سائبر سیکورٹی، ڈٹا، مصنوعی ذہانت و ایلو مون آ بروک آ ٹیک ایشو تیا لائخی تے ودفسا جہانی سفارت کاری ٹی چنکا و پدتموک ریاست آتا کڑد ءِ گچین کننگ کن کاریم کیک۔ فاؤنڈیشن داتم اسکان دنیا نا 208 ملک و ڈیہہ تیان 7،500 آن زیات مسکوہی طالب علم آتے سرسہبی اٹ تربیت تسنے۔ ایلو آخبتی مشن تیٹی ہرافتے ایلو کیٹیگری تیٹی ایوارڈ ملانے اوفتے ٹی یورپی یونین، فرانس، اٹلی، ناروے، قازقستان ، روس، برطانیہ، امریکہ و ایلوفک اوار ءُ۔
