واشنگٹن۔ 02 فروری (اے پی پی) امریکہ ٹی پاکستان نا سفیر مسعود خان پاکستانی نژاد امریکی پوریاگر آتے پارینے کہ پاکستان اٹی امریکی زرکاری ءِ ودفنگ حکومت نا اولیت ءِ۔ اوکیلفورنیا ٹی جوڑ پاکستان امریکن چیمبر آف کامرس (پی اے سی سی) نا چیئرمین وقار علی خان نا کماشی ٹی ورچوئل میٹنگ اٹی پارے کہ ننا اولیت پاک۔ امریکہ تعلقداری نا مون آ دننگ و پاکستان اٹی امریکی زرکاری ءِ ودفنگ ءِ۔ ساڑی حکومت مالیاتی ادارہ غاتے ملکی زرگزران نا غٹ بشخ آتیٹی زرکاری کن آسراتی فراوان کننگ تون اوار اوار پرکشش آسودہی ہم تننگ ءِ۔ اوپارے کہ پوسکن جوڑ مروک خصوصی زرکاری سہولت کونسل (ایس آئی ایف سی ) درملکی زرکارآتا پاکستان اٹ منافع بخش کاروبار بناکننگ نا کسر اٹی بروک اڑاند آتے مر کننگ کن عملی گام گیج کننگ ءِ۔ اوواپاری سرجزآتا مون آ دننگ و ہڑتوم آملک آتا کاروباری برادری تا تعلقداری ءِ سوگو کننگ نا کڑد انا ستاءِ کرسا پاک امریکہ واپاری و زرکاری نا تعلقداری ءِ مون آ دننگ کن مچ آ امریکہ ٹی کاریم کروک آ چندی چیمبر و واپاری تنظیم تا نیام اٹ زیات آن زیات کمکار ی نا گرج آ زور شاغا۔ اوپارےکہ تینا وسیلہ غاتا وطن آ پدی بننگ اٹ زرکاری کننگ آن پاکستانی امریکی زرکارآک نئے بیرہ بھاز زیات منافع کٹنگ ءُ بلکن او ملک انا راجی و اقتصادی شونداری ٹی ہم تینا بشخ ءِ شاغرہ۔ پی اے سی سی نا چیئرمین وقار علی خان سفیرءِ چیمبر نا چندی سرجز خاص وڑاٹ جان جوڑی ، خور و ٹیکسٹائل نا بشخ آتیٹی واپاری سرجزآتا مون آ دننگ اٹ دوئی مروک سرسہبی تا بارواٹی معلومدار کرے۔
