مقبوضہ کشمیر نا الس آ کروک آ ظلم آن دنیا ءِ معلومدار کننگ کن ہرکہول آ کشمیری ایڑھ ایلم تتون یکجہتی نا درشانی ءِ کننگک، شاہیرہ شاہد

اسلام آباد۔ 02 فروری (اے پی پی) بنجائی سیکرٹری حوالکاری وشینکاری شاہیرہ شاہد پارینے ک ننے ہر فورم آ کشمیری ایڑھ و ایلم تتون یکجہتی نا درشانی ءِ  کروئی مریک و اوفتا زی آ کروک آ ظلم و جور ءِ دنیا نا مون آ اتوئی مریک تانکہ دنیا ءِ معلوم مننگ کے کہ بھارت نا غیرکانودی کوزہ ٹی کشمیر نا مخلوق ہرا مشکل حالیت آتیٹی زند ءِ تیر کننگءُ۔ داخیال آتا درشانی ءِ او جمعہ نادے آ داڑے انفارمیشن سروسز اکیڈمی ٹی  ڈائریکٹوریٹ آف الیکٹرانک میڈیا اینڈ پبلیکیشنز نا کنڈآن یوم یکجہتی کشمیر بابت اڈہلوک ڈیجیٹل فوٹو گرافی اینڈ پیٹنگز نمائش اٹی کرے۔ دود آن تران کرسابنجائی سیکرٹری حوالکاری و شینکاری شاہیرہ شاہد مستی پارے کہ 5 فروری نادے انا اہمیت آن نن غٹ بلد اُن و ننے مرے کہ دادے ءِ پبی وڑاٹ اڈایتن تانکہ دنیا ءِ کشمیری تیا مروک آ ظلم و ستم آن معلومدار کننگ مرے۔ اوپارے کہ ہندوستان نا مدام کوشست مسنے کہ کشمیر نا مخلوق ءِ کشمیر آن بے دخل کننگے و ہموڑے ہندوتے آبادکننگے تانکہ ہراتم کہ ریفرنڈم مرے تو اوفتے دانا درکار نتیجہ دوئی مرے۔ اوپارے کہ ننے کشمیر اٹی ہندو آبادکاری نا برخلاف پبی توار بڑز کروئی مریک تانکہ بھارت تینا دا ناپاک مسخت آتیٹی سرسہب مف۔ یوم یکجہتی کشمیر نا دود آن تران کرسا ڈی جی ڈائریکٹوریٹ آف الیکٹرانک میڈیا اینڈ پبلیکیشنز ثمینہ فرزین شیخ پارے کہ ہراتم اسکان کشمیر نا ویل ایسر مفک پاکستان کشمیری الس نا اخلاقی، سیاسی، و سفارتی مخ تفی ءِ برجاتخک۔