اسلام آباد۔ 01 فروری (اے پی پی) دفترخارجہ نا ترجمان ممتاز زہرہ بلوچ پارینے کہ پاکستان نا حکومت و الس دوشنبے نادے 5 فروری آ یوم یکجہتی کشمیر ءِ پبی جوش و جوزہ اٹ اڈ ایترہ۔ پنچ شنبے نادے آ داڑے پریس حوال اٹی اوپارے کہ دادے پاکستانی و مچ آ دنیا ٹی رہینگوک کشمیری ، کشمیری الس تون اوفتا ناقابل تنسیخ حق خودارادیت نا دوئی کننگ کن اوفتا انصاف اٹ جہد اٹ یکجہتی نا درشانی ءِ کیرہ۔ اوپارے کہ مستین آنبار یوم یکجہتی کشمیر ءِ روایتی جوش وجوزہ اٹ اڈتننگ کن اسہ بھلو پروگرام اس ترتیب تننگانے۔ ترجمان پارے کہ پاکستان اقوام متحدہ نا سلامتی کونسل نا قرارداد آتا رداٹ جموں وکشمیر جھیڑہ نا انصاف اٹ و پرامن ایسری کن تینا کشمیری ایلم و ایڑھ تا سیاسی ، سفارتی و اخلاقی مخ تفی ءِ برجاتخک۔
