کراچی۔ 01 فروری (اے پی پی) پاکستان مرکزی مسلم لیگ این اے 231 اٹی جماعت اسلامی نا اومیتدار انجینئر عمرفاروق نا مخ تفی نا پڑو ءِ کرینے۔ پاکستان مرکزی مسلم لیگ آن تدوک آ دے جاری اعلامیہ نا رداٹ جماعت اسلامی ناڈل مخ تفی نا چرجوئی ٹی مرکزی مسلم لیگ کراچی نا صدر احمد ندیم اعوان تون مرکزی مسلم لیگ ہاؤس اٹی اوڑدہی کرے۔ جماعت اسلامی نا ڈل اٹی نائب امیر جماعت اسلامی کراچی و صدر الیکشن سیل جماعت اسلامی کراچی راجہ عارف سلطان، اومیتدار قومی اسمبلی این اے 231 انجینئر عمر فاروق، امیر جماعت اسلامی ضلع ملیرتوفیق الدین صدیقی و ریحان سلیم ئسک اوار ئسر۔ داوخت آ مرکزی مسلم لیگ نا راہشون انجینئر نعمان علی ، انیس انصاری ، محمد عثمان ئسک ساڑی ئسر۔ احمد ندیم اعوان پارے کہ جماعت اسلامی نا راہشون تے مرکزی مسلم لیگ ہاؤس آ بخیر اٹ پانہ۔ پاکستان مرکزی مسلم لیگ نا این اے 231 اٹی ہچ ءُ اومیتدار اس اف، نن این اے 231 نا حلقہ ٹی تینا جماعت اسلامی نا ایلم تا پبی مخ تفی نا پڑو ءِ کینہ۔ راجہ عارف و انجینئر عمر فاروق مرکزی مسلم لیگ نا مخ تفی آ احمد ندیم اعوان نا منت واری ءِ ہرفیر۔ اوفتا پاننگ ئس کہ مرکزی مسلم لیگ نا مخ تفی ءِ کننگ آ جماعت و اونا سرکڑدہ غاتا بھاز منتوا ر اُن۔
