لاہور۔ 04 اکتوبر (اے پی پی) مسلم لیگ (ن) نا سیکرٹری جنرل و مسکوہی بنجائی وزیر احسن اقبال پارینے کہ 21 اکتوبر آ محمد نواز شریف وطن آ پدی برسا پاکستان ءِ شونداری نا کنڈآ دیک، محمد نواز شریف نا پدی بننگ مزل نا حیثیت اس اختیار کرینے۔ داخیال آتا درشانی ءِ او چارشنبے نادے آ داڑے ماڈل ٹاؤن اٹی پریس کانفرنس آن تران کرسا کرے۔ احسن اقبال پارے کہ نن 2024ٹی لس گچین کاری تیٹی سرسہب مرسا الس ءِ کبینی آن نجات ترفنہ۔ اوپارے کہ محمد نواز شریف نا شخصیت نا سوب آن نن سنگت ملک آتون بے مٹ کمکاری ءِ بحال کننگ اٹ سرسہب مرینہ۔ پاناماکیس اٹ ہچ اس پیش تمیتو تو اقامہ نا بہانہ ءِ کرسا نواز شریف ءِ نابود کننگا ہرانا پاکستان بھلو قیمت اس ادا کرے۔ احسن اقبال پارے کہ محمد نواز شریف ءِ اسہ کنڈکرسا ہندن ءُ بندغ اسے اقتدار ءِ تننگا ہرا زند اٹی اسہ وار اس ہم اسہ یونین کونسل اس ہم چلیفتویسس۔ چیئرمین پی ٹی آئی ہراتم آئی ایم ایف تون معاہدہ کریکہ تو ننا قومی اسمبلی ٹی تقریر آک ساڑی ءُ ہراٹی نن پاریسن کہ دا پاکستان نا زرگزرانی فائدہ غاتا سوداءِ کننگ ءُ۔ نن ہمووخت آ قومی اسمبلی نا فلور آ پاریسن کہ بروک آ سال تیٹی دانا نتیجہ بدترین کبینی نا دروشم اٹ پیش تمک و نن اینو اونا بھرم ءِ کُننگ اُن۔ پاکستانی الس گچین کاری تیٹی محمد نواز شریف ءِ سرسہب کے تو دُن کہ 2013 غان پد نواز شریف نا کماشی ٹی پاکستان کبینی نا چکی آن آجومسوسس ، 2024 اٹی ولدا نن کبینی نا چکی آن الس ءِ سرسہب مرسا نجات ترفنہ۔ اوپارے کہ پاکستان نا ورناک دُوارہ باعزت روزگار دوئی کننگ کیرہ ہراوڑ 2013 غان پد نن پاکستان آن دہشت گردی ءِ چٹفیسن ہمووڑ 2024 آن پد ولدا نن وطن عزیز ءِ امن نا وت اس جوڑ کننگ نا سفرنا بناءِ کینہ ۔
