اسلام آباد۔ 04 اکتوبر (اے پی پی) پاکستان انٹرنیشنل ایئرلائن (پی آئی اے) نا ترجمان عبداللہ حفیظ خان پارینے کہ پی آئی اے نا پاکستان آن ٹورنٹو کن فضائی آپریشن ہڑدے نا رداٹ برجاءِ، اسلام آباد و لاہور آن ٹورنٹو کن ہڑتوم آ کنڈآتا چار جہاز ہفتہ وار روانہ مریرہ۔ چارشنبے نادے آ کینیڈا فضائی آپریشن نا بابت تینا وضاحتی بیان اٹی اوٹورنٹو ٹی جہاز آتے توننگ نا بابت خبرآتا وضاحت ءِ کرسا پارے کہ ٹورنٹو ایئرپورٹ آ ہینڈلنگ ایجنسی اتون واجبات آتا ادائیگی نا سوب آن جہاز نا لاہور روانگی ٹی ہرےمس۔ پاکستان وکینیڈا ٹی نظام الاوقات نا پرخ انا سوب آن ادائیگی ٹی تاخیر مس ہرانا سوب آن جہاز تینا تخوک آ وخت آن چار گھنٹہ نا تاخیر اٹ روانہ مس۔ ہینڈلنگ ایجنسی و فیول کمپنی نا اِرا لکھ ڈالر نا واجبات آتا ادائیگی ءِ کننگانے۔ ترجمان وضاحت کرسا میڈیا غان خواست کرینے کہ داوڑنا خبرآتے شینک و شائع کننگ آن مست ادارہ تون رجوع کننگے تانکہ حقی حالیت آتیان آگاہی مننگ کے۔ داوڑنا خبرآک ہراڑے قومی ادارہ نا ساکھ و وقار ءِ نسخان ایترہ ہموڑے مسافر آتا پت ءِ ہم متزلزل کیک ۔
