کوئٹہ۔ 04 اکتوبر (اے پی پی) اسسٹنٹ کمشنر ڈیرہ مراد جمالی اجمل خان مندوخیل نا تحصیلدار مجیب الرحمان ساتکزئی تون اوار السی غاوتا رداٹ سندھ بلوچستان قومی شاہراہ غا واقع دوکان تا مون آ تجاوزات آتا برخلاف کارروائی کننگا، دوکان تا دنگ اٹ زیات جاگہ غا جوڑ کروک آ تجاوزات آتے مشینری نا کمک اٹ اینک کننگا تجاوزات آتا سوب آن قومی شاہراہ غا خلل اتون اوار اوار الس ءِ ہن و براٹی ہم مشکل درپیش بسکہ کارروائی ڈپٹی کمشنر نصیر آباد بتول اسدی نا پرمان تیا الس نا غاوتے مون آتخسا کننگا، پوریاگر برادری تجاوزات آتا عمل آن پاناد کے، ایلو دروشم اٹ آخبت اٹ ہم کارروائی کننگک، اسسٹنٹ کمشنر دوکاندارتے سخت تنبیہ ہم کرے ، داوخت آ اسسٹنٹ کمشنر ڈیرہ مرادجمالی اجمل خان مندوخیل پارے کہ دوکان تا مون آ تجاوزات آتا سلفنگ نا سوب آن گڑاہلنگ کن بروک آ مخلوق ءِ بھاز مشکل آتون مون تروئی تمنگ ءِ داڑآن نئے بیرہ مخلوق نا مشکل آتیٹی ودکی مننگ ءِ بلکن ٹریفک نا روانگی ٹی ہم خلل تمنگ ءِ ہنداسوب آن الس نا مشکل آتے مون آتخسا دوکاندار تجاوزات آتا عمل آن پاناد کیر تانکہ مخلوق و مسافر آتے مشکل درپیش بف، اوپارے کہ ضلعی انتظامیہ تجاوزات آتا عمل ءِ اسُل سگپک انتظامیہ دا بابت کیہی وار دوکاندارتے تنبیہ ہم کننگانے ولے پوریاگر برادری نا کنڈآن ہچ ءُ خاطرخواہ گام گیج اس کننگتنے، اوکان پد اسسٹنٹ کمشنر اجمل خان مندوخیل ضلع نصیر آباد اٹی برجاپولیو مہم نا عمل نا مانیٹرنگ ءِ ہم کرے فیلڈ اٹی کاریم کروک آ ٹیم تتون اوڑدہی کرے و پولیو نا بابت آگاہی دوئی کرے ، اسسٹنٹ کمشنر مانیٹرنگ اٹی چناتے پولیو نا پڑی ہم کنفے و ٹیم تے پارت کرے کہ پولیو مہم ءِ سرسہب کننگ کن ہرممکن گام گیج کننگے۔
