کوئٹہ۔ 04 اکتوبر (اے پی پی)ڈسٹرکٹ کوآرڈی نیٹر ملیریا پروگرام سعداللہ خان جوگیزئی پارینے کہ ڈسٹرکٹ دکی نا چندی یونین کونسل آتیٹی ملیریاغان بچفنگ مہم برجاءِ، 1500 مخلوق ءِ ٹریننگ تننگانے ملیریاخطرناک جان لیوا مرض اسے وخت آ تشخیص و درمان المی ءِ، اِراتُو اٹی 15153 ٹیسٹ کرفنگا 4976کیس پازییٹو رپورٹ مس مفت درمان و دوائی تننگ انگ ءِ اوپارے کہ بی آرایس پی و انڈس ہسپتال کراچی نا کمک اٹ ڈسٹرکٹ دکی ٹی ملیریا غان بچفنگ آگاہی مہم السءِ مفت، درمان نا چرجوئی برجاءِ، بی آرایس پی ملیریا پروگرام نا ڈسٹرکٹ کوآرڈی نیٹر سعداللہ خان جوگیزئی پارے کہ ننا ملیریا سینٹر بی ایچ یوز آر ایچ سی ٹی ملیریانا مفت درمان و دوائی تننگ انگ ءِ، اوڑتون اوار پرائیویٹ کلینک و لیبارٹری تا مثبت رپورٹ بروک آ ناجوڑ آتا ہم مفت درمان ودوائی تننگ انگ ءِ الس ملیریا سینٹرآتیان فائدہ ہرفر و تشخیص کن مفت ٹیسٹ کرفر، اوپارے کہ داسہ ملیریاکن پوسکن آ دوادریافت مسنے ہرانا اسہ خور اس ہلنگ آن درمان ممکن ءِ اوپارے کہ ملیریا طفیلی جراثیم نا سوب آن مریک ہراساہدار اسے نا جون اٹی پترینگسا جاگہ کیک و دنیا ٹی زیات تر پشہ غاتا کُننگ آن تالان مریک و پشہ غاتا کُننگ آن پد مروک آ دین ملیریا پیراسائیٹ ہرا ملیریاپاننگک ملیریانا نشانی تیٹی ترندال لڑزنگ وار وار آ خید بننگ، کاٹم نا خل جون نا دڑد، متلی و اُلٹی بننگ اوار ءِ نناداڑے ملیریا ءِ اسہ چنکو ناجوڑی اس تکنگک ولے ملیریا دنیا ٹی ساڑی متکن آ ناجوڑی تیان اسٹ ءِ ہراڑان مچ آ دنیا ٹی سالانہ لکھ آ بندغ و خاص وڑاٹ کم وئی نا مخلوق زوال کیرہ گیشتر وخت وخت آ تشخیص و درمان مفننگ نا سوب آن انسان نا زند خطرہ ٹی تمنگ کیک ،اوپارے کہ الس ملیریا غان بچنگ کن وخت آ ٹیسٹ و مثبت رپورٹ بننگ آ تینا درمان ءِ کرفر و رکھی گام گیج ضرور اختیار کیر ، مچھر دانی تے کاریم اٹ اتیر و ایلو کنوئی آ گڑاتا باہ ءِ ہلیر تخر انتئے کہ زرس بے احتیاطی نما و نما دوست آتیکن جان لیوا جوڑ مننگ کیک۔
