کوئٹہ۔ 04 اکتوبر (اے پی پی) ڈپٹی کمشنر جھل مگسی اعجاز سرور نا پارت آتے مون آتخسا اسسٹنٹ کمشنر گنداوہ محمد صادق کبدانی ڈسٹرکٹ سپورٹ یونٹ (پی پی ایچ آئی) آفس گنداوہ نادورہ ء کرے۔ داوخت آ ڈسٹرکٹ سپورٹ مینجر(PPHI)تنویر احمد بلیدی اودے ہندا آفس نا چندی بشخ ، مین میڈیکل اسٹور نا معائنہ ءِ کرفے و مچ آ ضلع ٹی 14 بنداوی جان جوڑی نا ہند (BHU,s)تیٹی طبی آسراتی و دوائی تا دستیابی نا بابت سرجم حوال تس ، اسسٹنٹ کمشنر گنداوہ محمد صادق کبدانی پارے کہ ڈپٹی کمشنر جھل مگسی اعجاز سرور نا خصوصی پارت ءِ کہ ضلع نا غٹ بنداوی جان جوڑی ہند آتیٹی دوائی و ملیریاکٹ آتا دستیابی و مرمر انگا علاقہ غاتیان بروک آ ناجوڑ آتے طبی امداد نا فراوانی اتون ڈاکٹر و ایلوعملہ نا حاضری ءِ ہم پک کیر، اوپارےکہ غٹ ڈاکٹر وایلو اسٹاف تینا فرض ءِ مقدس تکسا جوانی اٹ اداکرسا کیر غٹ ڈاکٹر و ایلو اسٹاف آ زور شاغا کہ حکومت بلوچستان نا اولیت آتیٹی غریب و مسکین تے بنداوی جان جوڑی ہند و سرکاری ہسپتال آتیٹی مفت دوائی و طبی آسراتی تا فراوانی ءِ ہراڑکن ہلہلہ ئی بنداو تیا حکومت بلوچستان نا کنڈآن غٹ تر وسیلہ غاتے کاریم اٹ اتنگ انگ ءِ تانکہ نیزگار الس حکومت نا داگام گیج آتیان پبی وڑاٹ فائدہ ہرفنگ کیر داڑکن المی ءِ کہ ڈاکٹر و ایلو جان جوڑی نا بشخ اتون گنڈوک عملہ تینا فرض انا ادائیگی ٹی ہروڑنا ڈیوالئی و لاپرواہی نا درشانی ءِ کننگ آن پاناد کیر، حکومت ہرازمواری ءِ تسنے اوڑا پورو سلنگ کن غٹ تر توانائی تے خڑچ کیر، سستی، جان بڈی ، و ڈیوالئی نا درشانی ءِ اسُل سگنگ پننگک ۔
