واشنگٹن۔ 04 اکتوبر (اے پی پی) امریکی ایوان نمائندگان اٹی بے کچ راستیکو دُو انا ری پبلکنز اسپیکر کیون مک کارتھی ءِ ووٹنگ نا کمک اٹ اینک کرے۔ برطانوی اخبارنا رداٹ ایوان نمائندگان نا 234 سال انا تاریخ اٹی اولیکو وار اسپیکر اسے نا برطرفی نا مخ تفی ءِ راستیکو دُ وانا بیرہ منہ ری پبلکنز کریر۔ ووٹنگ آن پد صحافی تتون گپ وتران کرسا مک کارتھی پیدوار کرے کہ او دُوارہ اسپیکر نا گچین کاری تیٹی بشخ ہلنگ کن ارادہ تخپک۔ اوپارےکہ او ایوان نا 55 می اسپیکر جوڑ مس ہرا غٹ آن بھلا اعزازآن اسٹ ءِ۔ اوپارے کہ سہی کاریم کننگ مدام آسان مفک ولے دا المی ءِ ۔ 58 سال انا مک کارتھی داوخت آ کنزرویٹوزاٹی غم و غصہ ودی کرے ہراتم اوہفتہ نا ایسر آ وائٹ ہاؤس نا مخ تفی اٹ ہڑتوم آ کنڈآتا اسٹاپ گیپ فنڈنگ نا گام ءِ منظور کرے تانکہ حکومتی شٹ ڈاؤن ءِ توننگ مرے۔ ایوان نمائندگان اٹی ری پبلکن باسک آتا کنڈآن میکارتھی نا برخلاف پیش کروک آ قرارداد آ ایوان نمائندگان 210 نا مقابلہ ٹی 216 وونٹ آتے اٹ اسپیکر ءِ عہدہ غان فارغ کرے۔
