اسلام آباد۔ 03 اکتوبر (اے پی پی) گوادر پورٹ ڈریجنگ پلان نا پروجیکٹ ڈائریکٹر داؤد بلوچ پارینے کہ گوادر پورٹ آ نیویگیشنل چینل و لنگرانداز علاقہ نا بیڈ آن کم و ود 5 لکھ ٹن مش کشنگانے، دا ڈٹ اسہ سال انا تہہ ٹی پورو مریک۔ اے پی پی تون خصوصی گپ وتران کرسا اوپارے کہ دا ڈٹ 4.7 ارب روپئی نا خڑچ آن 12 تُو اٹی پورو مریک۔ دا ڈٹ مارچ 2023اٹی بناکریسس۔ اوپارے کہ چائنا ہاربر انجینئرنگ کمپنی لمیٹڈ (سی ایچ ای سی ) مارچ اٹی سفائی نا عمل نا بنامننگ آن پد آن داتم اسکان سرسہبی اتون 5 لکھ ٹن مش کشانے۔ دا ڈٹ انا مسخت گوادر پورٹ آ نیویگیشنل چینل نا اصل گہرائی ءِ بحال کننگ ءِ، ہراڑان ہیوی ویٹ جہاز آتے گچین وڑاٹ نقل و حرکت کننگ کیر۔ دا بحالی چندی وڑنا جہاز آتا آوار نقل و حرکت ءِ پک کیک، بیدس اڑاند اسے آن آسان ڈاکنگ نا آسراتی فراوان کیک۔ اوپارے کہ 4.7 ارب روپئی نا خڑچ آن گوادر پورٹ آ 14.5 میٹر نا قدرتی و اصل آپریشنل گہرائی ءِ دُوارہ دوئی کننگ نا ڈٹ ءِ۔ اوپارے کہ سی ایچ ای سی و جی پی اے نا نیام اٹ دستخط مروک معاہدہ نا رداٹ ’’گوادر پورٹ نا نیویگیشنل چینل نا مینٹیننس ڈریجنگ‘‘ ڈٹ ءِ 12 تُو اٹی پورو کننگک۔
